ഒന്നും സഭവിക്കില്ല, യുവപ്രാതിനിധ്യം ചാണ്ടിഉമ്മനില്‍ തീരും

തദ്ദേശ തിരഞ്ഞെടുപ്പിലെ തോല്‍വിക്ക് ശേഷം കോണ്‍ഗ്രസില്‍ നടന്നത് വലിയ ചര്‍ച്ചകളാണ്. അതുകൊണ്ട് തന്നെ ഇക്കുറി കേരളത്തിലെ നിയമസഭാ തെരഞ്ഞെടുപ്പിന്റെ ഒരുക്കങ്ങള്‍ എഐസിസി നേരിട്ടു നടത്താനാണ് തയ്യാറെടുക്കുന്നത്.
എന്നാല്‍ ഈ മാറ്റങ്ങളൊന്നും ഈ തിരഞ്ഞെടുപ്പില്‍ നടക്കില്ലന്നും, തങ്ങള്‍ പറയുന്നിടത്ത് കാര്യങ്ങള്‍ പത്തിക്കുമെന്നും ഗ്രൂപ്പ് നേതാക്കള്‍. യുവജനങ്ങള്‍ക്ക് സീറ്റുകൊടുക്കണം എന്ന വാദത്തിന്റെ പേരില്‍ ചാണ്ടി ഉമ്മനും, ചിന്റു കുര്യന്‍ ജോയിക്കും സീറ്റ് കിട്ടുമെന്നുമാണ് മുതിര്‍ന്ന കോണ്‍ഗ്രസ് നേതാവ് ഹെഡ് ലൈന്‍ കേരളയോട് പറഞ്ഞത്.
കേരളത്തില്‍ ഓരോ മണ്ഡലത്തിലെയും സ്ഥിതി മനസ്സിലാക്കുന്ന പ്രക്രിയ കേന്ദ്ര നേതൃത്വം 7ന് കോഴിക്കോട്ട് തുടങ്ങും. ഇതിനായി 2016ലെ തിരഞ്ഞെടുപ്പില്‍ ജയിച്ചതും തോറ്റതുമായ നേതാക്കളുടെ മേഖലാതല യോഗം വിളിച്ചു ചേര്‍ക്കുന്നുണ്ട്. ഇതിനു തുടര്‍ച്ചയായി മധ്യ, തെക്കന്‍ മേഖലാ യോഗങ്ങളും ചേരും. എംപിമാര്‍, എംഎല്‍എമാര്‍, കെപിസിസി ഭാരവാഹികള്‍ എന്നിവരെ കൂടാതെയാണ് 2016ല്‍ പരാജയപ്പെട്ടവരെയും വിളിക്കുന്നത്. സാഹചര്യം അവലോകനം ചെയ്യും, ഉച്ചയ്ക്കു ശേഷം ഓരോരുത്തരെയും എഐസിസി സംഘം പ്രത്യേകം കാണും.

തദ്ദേശ തിരഞ്ഞെടുപ്പു തോല്‍വിയുടെ അടിസ്ഥാനത്തില്‍ ഉദ്ദേശിക്കുന്ന സംഘടനാ അഴിച്ചുപണിക്ക് ഇന്നും നാളെയുമായി ധാരണയാകുമെന്നു കരുതുന്നു.
ജനപ്രതിനിധികള്‍ ഡിസിസി അധ്യക്ഷ പദം വഹിക്കുന്ന എറണാകുളം, പാലക്കാട്, വയനാട് ജില്ലകളില്‍ പുതിയ ഡിസിസി പ്രസിഡന്റുമാര്‍ വരും. തദ്ദേശ തിരഞ്ഞെടുപ്പില്‍ തീര്‍ത്തും നിറംകെട്ട ഡിസിസികളിലും മാറ്റം ഉണ്ടാകും.

പുതിയ ഡിസിസി പ്രസിഡന്റിനെ നിയമിക്കുമ്പോള്‍ ഗ്രൂപ്പ് മാനദണ്ഡമാകില്ലെന്നു കേരള നേതൃത്വത്തെ എഐസിസി അറിയിച്ചു. ജില്ലയില്‍ കോണ്‍ഗ്രസിനെ നയിക്കാന്‍ ഏറ്റവും യോജ്യനായ ആളെത്തന്നെ നിയോഗിക്കും. ഈ ജില്ല, അല്ലെങ്കില്‍ മണ്ഡലം ഈ ഗ്രൂപ്പിന് എന്ന മട്ടിലുള്ള വീതംവയ്പ് അനുവദിക്കില്ലന്ന് എ ഐ സി സി പറയുന്നുണ്ട്. പക്ഷെ എ ഗ്രൂപ്പ് അത് അനുവദിക്കില്ല. തങ്ങളുടെ സീറ്റും സ്ഥാനാര്‍ത്ഥി ലിസ്റ്റും അവര്‍ നല്‍കും.
പോഷക സംഘടനാ ഭാരവാഹികളുടെ യോഗവും എഐസിസി പ്രതിനിധികളുടെ സാന്നിധ്യത്തില്‍ ചേരുന്നുണ്ട്. 10 ദിവസത്തോളം സംഘം കേരളത്തില്‍ തുടരും. അതേസമയം യുവാക്കള്‍ക്ക് അടക്കം കൂടുതല്‍ പരിഗണന സ്ഥാനാര്‍ത്ഥിപട്ടികയില്‍ ലഭിക്കുമെന്നാണ് ലഭിക്കുന്ന വിവരം. ഈ ആവശ്യം ശക്തമാക്കാന്‍ യൂത്ത് കോണ്‍ഗ്രസും തയ്യാറെടുക്കുന്നുണ്ട്.