വളാഞ്ചേരിയില്‍ കോണ്‍ഗ്രസ് ഓഫീസില്‍ കൂട്ടത്തല്ല്

വളാഞ്ചേരി : മാറാക്കര പഞ്ചായത്ത് തെരഞ്ഞെടുപ്പ് ഫലം വിലയിരുത്താന്‍ കാടാമ്പുഴയില്‍ ചേര്‍ന്ന മണ്ഡലം കോണ്‍ഗ്രസ് നേതാക്കളുടെ യോഗത്തില്‍ കൂട്ടത്തല്ല്. നേതാക്കള്‍ ഓഫീസിലെ കസേരകളെടുത്ത് പരസ്പരം എറിഞ്ഞു. ആറ് കസേര പൂര്‍ണമായും തകര്‍ന്നു. അങ്ങോട്ടുമിങ്ങോട്ടും കേട്ടാലറയ്ക്കുന്ന ഭാഷയില്‍ തെറിവിളിയും നടത്തി. തെരഞ്ഞെടുപ്പില്‍ ചേലക്കുത്ത് വാര്‍ഡില്‍നിന്ന് കോണ്‍ഗ്രസ് റിബല്‍ സ്ഥാനാര്‍ഥി മത്സരിച്ചിരുന്നു. അദ്ദേഹത്തിന് തെരഞ്ഞെടുപ്പ് ഫണ്ട് നല്‍കിയതിനെ ചിലര്‍ ചോദ്യംചെയ്തു.

പഞ്ചായത്ത് മുന്‍ വൈസ് പ്രസിഡന്റ് രാജിവയ്ക്കാന്‍ കാരണം മുന്‍ മണ്ഡലം ഭാരവാഹിയുടെ പിടിപ്പുകേടാണെന്നും ആരോപണമുയര്‍ന്നു. ഇതോടെയാണ് നേതാക്കള് രണ്ടു ചേരികളായി തിരിഞ്ഞ് ഏറ്റുമുട്ടിയത്. കോണ്‍ഗ്രസ് ഓഫീസ് കെട്ടിടത്തില്‍ പ്രവര്‍ത്തിക്കുന്ന ജ്വല്ലറി അടക്കമുള്ളവയുടെ വാടക വരുമാനം കൃത്യമായി കാണിച്ചിട്ടില്ലെന്നും ആക്ഷേപമുയര്‍ന്നു. കൈയാങ്കളിക്ക് നേതൃത്വം നല്‍കിയ രണ്ട് നേതാക്കള്‌ക്കെതിരെ നടപടിക്കായി മണ്ഡലം കമ്മിറ്റി ജില്ലാ കമ്മിറ്റിക്ക് ശുപാര്‍ശ നല്‍കി.