മുന്‍ കോണ്‍ഗ്രസ് കൗണ്‍സിലറെ സ്ഥാനാര്‍ത്ഥിയാക്കി എല്‍ഡിഎഫ്

തൃശ്ശൂര്‍ ജില്ല ഉറ്റുനോക്കുന്ന പോരാട്ടത്തില്‍ സ്ഥാനാര്‍ത്ഥികളായി

തൃശൂര്‍ കോര്‍പ്പറേഷനിലെ പുല്ലഴി ഡിവിഷന്‍ തെരഞ്ഞെടുപ്പ് ജില്ലയൊന്നാകെ ഉറ്റുനോക്കുന്ന ഒന്നാണ്. നേരത്തെ ഇടതുസ്ഥാനാര്‍ത്ഥിയായ അഡ്വ എംകെ മുകുന്ദന്‍ അന്തരിച്ചതിനെ തുടര്‍ന്നാണ് ഇവിടെ തെരഞ്ഞെടുപ്പ് മാറ്റിവെച്ചത്. ജയിച്ചാല്‍ ഭരണം ഉറപ്പിക്കാം എന്നതാണ് എല്‍ഡിഎഫ് ആലോചനയെങ്കില്‍ വിജയിച്ചാല്‍ നിലവില്‍ മേയറായ കോണ്‍ഗ്രസ് വിമതനായ മേയറെ കൂട്ടി ഭരണം തിരിച്ചു പിടിക്കാമെന്നതാണ് യുഡിഎഫ് തന്ത്രം. കൂടുതല്‍ വോട്ടുകള്‍ നേടാനാണ് ബിജെപി ശ്രമം.
മുന്‍ കോണ്‍ഗ്രസ് കൗണ്‍സിലറെയാണ് ഇടതുമുന്നണി ഇവിടെ സ്ഥാനാര്‍ത്ഥിയാക്കിയിരിക്കുന്നത്. അഡ്വ മഠത്തില്‍ രാമന്‍കുട്ടിയാണ് സ്ഥാനാര്‍ത്ഥി. 2000ല്‍ കോര്‍പ്പറേഷനില്‍ കൗണ്‍സിലറായിരുന്നു രാമന്‍കുട്ടി. 1987 മുതല്‍ അയ്യന്തോള്‍ പഞ്ചായത്തംഗംവും 1995ല്‍ വൈസ് പ്രസിഡണ്ടുമായിരുന്നു. 2015ല്‍ കോണ്‍ഗ്രസ് വിമതനായി മത്സരിച്ചു. എല്‍ഡിഎഫിനെ സംബന്ധിച്ചിടത്തോളം അഭിമാന പോരാട്ടമാണ് ഇവിടെ നടക്കുന്നത്. കോണ്‍ഗ്രസ് മണ്ഡലം പ്രസിഡണ്ടായ കെ രാമനാഥനാണ് യുഡിഎഫ് സ്ഥാനാര്‍ത്ഥി. കോണ്‍ഗ്രസിന്റെ സിറ്റിങ് സീറ്റായിരുന്ന പുല്ലഴി കഴിഞ്ഞ തവണയാണ് എല്‍ഡിഎഫ് പിടിച്ചെടുത്തത്. ഇക്കുറി പുല്ലഴി സ്വന്തമാക്കി കോര്‍പ്പറേഷന്‍ ഭരണത്തിലേക്ക് പോകാനാണ് യുഡിഎഫ് ശ്രമം.ബിഡിജെഎസിനായിരുന്നു നേരത്തെ എന്‍ഡിഎ സീറ്റ് അനുവദിച്ചിരുന്നത്. എന്നാല്‍ ഉപതെരഞ്ഞെടുപ്പില്‍ ബിജെപി തന്നെയാണ് മത്സരിക്കുന്നത്. ബിജെപി മുന്‍ ജില്ലാ കമ്മറ്റി അംഗം സന്തോഷ് പുല്ലഴിയാണ് എന്‍ഡിഎ സ്ഥാനാര്‍ത്ഥി. എല്‍ഡിഎഫിന് 24, യുഡിഎഫിന് 23 എന്നിങ്ങനെയാണ് കോര്‍പ്പറേഷനിലെ സീറ്റ് നില. കോണ്‍ഗ്രസ് വിമതന്‍ പിന്തുണച്ചതോടെയാണ് എല്‍ഡിഎഫിന് ഭരണം ലഭിച്ചത്.