മുനീറിനെ സേഫ് സോണിലേക്ക് മാറ്റാന്‍ ആലോചന

കോഴിക്കോട് സൗത്തില്‍ പികെ ഫിറോസിനെ പരിഗണിക്കുന്നു

നിയമ സഭാ തെരഞ്ഞെടുപ്പില്‍ കോഴിക്കോട് സൗത്ത് മണ്ഡലത്തില്‍ ഇത്തവണ യൂത്ത് ലീഗ് സംസ്ഥാന സെക്രട്ടറി പി.കെ. ഫിറോസിനെ പരിഗണിക്കുന്നു. മുസ്ലിം ലീഗ് നിയമസഭാ കക്ഷി നേതാവ് ഡോ. എം.കെ. മുനീര്‍ കഴിഞ്ഞ തെരഞ്ഞെടുപ്പില്‍ മത്സരിച്ച് വിജയിച്ച മണ്ഡലമായിരുന്നു ഇത്. മുനീറിനെ ഇത്തവണ കൊടുവള്ളി മണ്ഡലത്തില്‍ മത്സരിപ്പിക്കാനാണ് ലീഗ് ആലോചന. തെരഞ്ഞെടുപ്പില്‍ സംസ്ഥാനം മുഴുവന്‍ പ്രചാരണത്തിനുണ്ടാവേണ്ട മുനീറിന് ഒരു മണ്ഡലത്തില്‍ മാത്രം ശ്രദ്ധ കേന്ദ്രീകരിക്കാനാവില്ലെന്നത് പരിഗണിച്ച് കൂടുതല്‍ സുരക്ഷിതമായ മണ്ഡലത്തിലേക്ക് മാറ്റുന്നതാണ് ഗുണകരം എന്നതും ആലോചനയ്ക്ക് പിന്നിലുണ്ട്. കഴിഞ്ഞ തെരഞ്ഞെടുപ്പില്‍ ലീഗ് വിമതനായി മത്സരിച്ച കാരാട്ട് റസാഖ് ആണ് കൊടുവള്ളിയില്‍ വിജയിച്ചത്. എന്നാലും കൊടുവള്ളിയെ സുരക്ഷിത മണ്ഡലമായാണ് ഇപ്പോഴും ലീഗ് കണക്കാക്കുന്നത്. 2006 ല്‍ പിടിഎ റഹീം, 2016 ല്‍ കാരാട്ട് റസാഖ് എന്നീ രണ്ടു എല്‍ഡിഎഫ് സ്ഥാനാര്‍ത്ഥികള്‍ മാത്രമാണ് ഇതുവരെയും കൊടുവള്ളിയില്‍ വിജയിച്ചിട്ടുള്ളത്. മുസ്ലിം ലീഗ് നേതാക്കളായിരുന്ന ഇരുവര്‍ക്കും ലീഗിലെ പ്രാദേശിക പ്രശ്നങ്ങള്‍ വിജയത്തിന് സഹായിച്ചെന്നാണ് കരുതപ്പെടുന്നത്. സംസ്ഥാന തല നേതാവായ മുനീര്‍ രംഗത്തെത്തുന്നതോടെ ഇത്തരം ഭിന്നതകള്‍ക്ക് പ്രസക്തിയില്ലാതാവുമെന്നും ലീഗ് കണക്കുകൂട്ടുന്നു.