ഇടഞ്ഞ ശോഭാ സുരേന്ദ്രന്‍ അടങ്ങുമോ?

നിയമസഭാ തെരഞ്ഞെടുപ്പ് അടുത്ത സാഹചര്യത്തില്‍, ഉടക്കി നില്‍ക്കുന്ന ശോഭാ സുരേന്ദ്രനെ അനുയിപ്പിക്കാന്‍ ഒരുങ്ങുകയാണ് ബിജെപി. കേന്ദ്ര നിര്‍ദ്ദേശപ്രകാരം സംസ്ഥാനനേതൃത്വം ശോഭയുമായുള്ള ചര്‍ച്ചക്കായി എ എന്‍ രാധാകൃഷ്ണനെ ചുമതലപ്പെടുത്തി. ഇന്നോ നാളെയോ സമവായചര്‍ച്ച നടക്കുമെന്നാണ് സൂചന. അടുത്തയാഴ്ച ശോഭാ സുരേന്ദ്രന്‍ കേന്ദ്ര നേതാക്കളുമായി കൂടിക്കാഴ്ച നടത്തുന്നുണ്ട്.നേതൃത്വത്തിനെതിരെ പരസ്യക്കലാപക്കൊടി ഉയര്‍ത്തിയ ശോഭാ സുരേന്ദ്രന്‍ അതിവേഗമാണ് സംസ്ഥാന ബിജെപിയില്‍ പുതിയ ഗ്രൂപ്പുണ്ടാക്കിയത്. കെ സുരേന്ദ്രന്‍ പ്രസിഡന്റായ ശേഷം പരിഗണന കിട്ടാതെ പോയ പി എം വേലായുധന്‍. കെ പി ശ്രീശന്‍, ജെ ആര്‍ പത്മകുമാര്‍ അടക്കമുള്ളവര്‍ ശോഭയ്ക്ക് ഒപ്പം ചേര്‍ന്നു. കൃഷ്ണദാസ് പക്ഷത്തിന്റെ കൂട്ട് പിടിച്ച് സുരേന്ദ്രനെതിരെ ശോഭാഗ്രൂപ്പ് നീക്കങ്ങള്‍ ശക്തമാക്കിയപ്പോള്‍ സുരേന്ദ്രനും തിരിച്ചടിക്ക് ശ്രമം തുടങ്ങി.
പാര്‍ട്ടി പരിപാടികളില്‍ നിന്നും വിട്ടുനില്‍ക്കുന്നത് അച്ചടക്കലംഘനമായി ഉന്നയിച്ച് ശോഭക്കെതിരായ നടപടിക്കായിരുന്നു നീക്കം. ശോഭ പാര്‍ട്ടി വിട്ടേക്കുമെന്ന് വരെ അഭ്യൂഹങ്ങള്‍ ഉയര്‍ന്നു. പക്ഷെ നിയമസഭാ തെരഞ്ഞെടുപ്പ് അടുത്തിരിക്കെ ശോഭയെ പോലുള്ള നേതാവിനെ ഒപ്പം നിര്‍ത്താനാണ് കേന്ദ്ര നേതൃത്വത്തിന്റെ നിര്‍ദ്ദേശം.
ആര്‍എസ്എസിനും സമാനനിലപാടാണുള്ളത്. ഈ സാഹചര്യത്തിലാണ് എ എന്‍ രാധാകൃഷ്ണനെ സമവായദൗത്യത്തിനായി നിയോഗിച്ചത്. കോര്‍കമ്മിറ്റിയിലെ സ്ഥാനം അടക്കമുള്ള ആവശ്യങ്ങള്‍ ശോഭ എ എന്‍ രാധാകൃഷ്ണനുമായുള്ള ചര്‍ച്ചയിലാവശ്യപ്പെടും. മുതിര്‍ന്ന നേതാക്കള്‍ക്ക് വേണ്ട പരിഗണന വേണമെന്നും പറയും.
ആവശ്യങ്ങളില്‍ സംസ്ഥാന നേതൃത്വം സ്വീകരിക്കുന്ന നിലപാടാണ് പ്രധാനം. അതിനിടെ പരാതി തീര്‍ക്കണമെന്നാവശ്യപ്പെട്ട് മൂന്ന് തവണ കേന്ദ്രത്തിന് കത്തയച്ച ശോഭാ സുരേന്ദ്രന്‍ അടുത്തയാഴ്ച ദില്ലിയില്‍ നേരിട്ടെത്തുന്നുണ്ട്. 14-നോ 15-നോ അമിത്ഷാ, ദേശീയാധ്യക്ഷന്‍ ജെ പി നദ്ദ അടക്കമുള്ള നേതാക്കളുമായി കൂടിക്കാഴ്ച നടത്തും. നിര്‍ണ്ണായക തെരഞ്ഞെടുപ്പില്‍ ശോഭാ സുരേന്ദ്രനെ ഏതെങ്കിലും എ പ്ലസ് മണ്ഡലത്തില്‍ ഇറക്കണമെന്നാണ് കേന്ദ്രത്തിന്റെ ആഗ്രഹം. പാര്‍ട്ടിയോട് അകന്ന ശോഭയാകട്ടെ മത്സരിക്കാനില്ലെന്ന നിലപാടിലാണ്. വരും ദിവസങ്ങളിലെ ചര്‍ച്ചകളാണ് ഇനി ഇക്കാര്യത്തില്‍ നിര്‍ണായകമാകുക.