ഇപി ജയരാജനെ സംസ്ഥാന സെക്രട്ടറി സ്ഥാനത്തേക്ക് പരിഗണിക്കുന്നു; മത്സരിക്കില്ല;

കെകെ ശൈലജ മട്ടന്നൂരിലേക്ക്

നിയമസഭാ തെരഞ്ഞെടുപ്പില്‍ വ്യവസായ മന്ത്രി ഇപി ജയരാജന്‍ മത്സരിക്കില്ല. പാര്‍ട്ടി സംസ്ഥാന സെക്രട്ടറി സ്ഥാനത്തേക്ക് പരിഗണിക്കപ്പെടുന്ന സാഹചര്യത്തിലാണ് ഇപി ജയരാജന്‍ മത്സരത്തില്‍ നിന്നും വിട്ടുനില്‍ക്കുന്നത്. സുപ്രഭാതം ദിനപത്രമാണ് ഇക്കാര്യം റിപ്പോര്‍ട്ട് ചെയ്യുന്നത്. ഇപി ജയരാജന്‍ പ്രതിനീധികരിക്കുന്ന മട്ടന്നൂര്‍ നിയമസഭാ മണ്ഡലത്തില്‍ ആരോഗ്യമന്ത്രി കെകെ ശൈലജ സ്ഥാനാര്‍ത്ഥിയായേക്കും.
മന്ത്രി സ്ഥാനം രാജി വെച്ച് ഇപി ജയരാജനെ പാര്‍ട്ടി സെക്രട്ടറിയാക്കണമെന്ന കാര്യം നേരത്തെ സിപി ഐഎമ്മില്‍ ആലോചനയുണ്ടായിരുന്നു. നിയമസഭാ തെരഞ്ഞെടുപ്പ് കഴിയുന്നതിന് പിന്നാലെ സിപിഐഎം സമ്മേളനങ്ങളിലേക്ക് കടക്കും.എല്‍ഡിഎഫില്‍ തിരിച്ചെത്തിയ എല്‍ജെഡിക്ക് കൂത്തുപറമ്പ് സീറ്റ് നല്‍കേണ്ടതിനാലാണ് അവിടുത്തെ സിറ്റിംങ് എംഎല്‍എയായ കെകെ ശൈലജ മട്ടന്നൂരിലേക്ക് മാറും. കൂത്തുപറമ്പ് ലഭിച്ചാല്‍ എല്‍ജെഡിയില്‍ നിന്നും മുന്‍മന്ത്രി കൂടിയായ കെപി മോഹനന്‍ മത്സരിക്കും. രണ്ട് ടേം പൂര്‍ത്തിയായ എംഎല്‍എമാരായ ടിവി രാജേഷ്, ജയിംസ് മാത്യൂ, സി കൃഷ്ണന്‍ എന്നിവര്‍ മത്സര രംഗത്തുണ്ടാവില്ല. പയ്യന്നൂരില്‍ പി ജയരാജന്‍, ടി ഐ മധുസൂദനന്‍ എന്നിവരുടെ പേരുകളും പരിഗണിക്കുന്നുണ്ട്.