ഉമ്മന്‍ചാണ്ടിയും മുഖ്യമന്ത്രി സ്ഥാനത്തേക്ക് പരിഗണനയില്‍

കൂടുതല്‍ എംഎല്‍എമാര്‍ പിന്തുണക്കുന്നവര്‍ക്ക് സ്ഥാനമെന്ന് കെ മുരളീധരന്‍

യുഡിഎഫ് മന്ത്രിസഭയില്‍ ഉമ്മന്‍ചാണ്ടി മുഖ്യമന്ത്രി സ്ഥാനത്തേക്ക് പരിഗണനയിലെന്ന് കെ മുരളീധരന്‍ എംപി. കൂടുതല്‍ എംഎല്‍എമാര്‍ പിന്തുണക്കുന്നവര്‍ മുഖ്യമന്ത്രിയാവുമെന്നും രമേശ് ചെന്നിത്തലക്കൊപ്പം ഉമ്മന്‍ചാണ്ടിയും പരിഗണനയില്‍ ഉണ്ടെന്നും അദ്ദേഹം പറഞ്ഞു. തദ്ദേശ തെരഞ്ഞെടുപ്പില്‍ സീറ്റ് വീതം വെച്ചത് പോലെ ഇത്തവണ ആവര്‍ത്തിക്കരുതെന്നും മുരളീധരന്‍ എംപി നിര്‍ദേശിച്ചു. താഴെ തട്ടില്‍ പാര്‍ട്ടിക്ക് ചലനമുണ്ടാക്കാനായില്ല, ക്രൈസ്തവ നേതാക്കളുമായി ഹൃദയം തുറന്ന് ചര്‍ച്ച വേണമെന്നും മുരളീധരന്‍ പറഞ്ഞു.
വടകരക്ക് പുറത്ത് തെരഞ്ഞെടുപ്പ് പ്രചരണത്തിനില്ലെന്ന് നിലപാടില്‍ ഉറച്ച് നില്‍ക്കുകയാണ് അദ്ദേഹം. അതേസമയം മുഖ്യമന്ത്രി ആരാവണമെന്ന് തീരുമാനിക്കുന്നത് എംഎല്‍എമാരാണെന്നും അവര്‍ക്കിടയില്‍ സമവായമുണ്ടാക്കാന്‍ ഹൈക്കമാന്‍ഡ് മുന്‍കൈ എടുക്കുമെന്നും എല്ലാവരേയും ഒരുപോലെ തൃപ്തിപ്പെടുത്താന്‍ കഴിഞ്ഞില്ലെങ്കിലും തീരുമാനങ്ങള്‍ ഹൈക്കമാന്‍ഡ് അടിച്ചേല്‍പ്പിക്കില്ലെന്നുമായിരുന്നു വിഷയത്തില്‍ സംസ്ഥാനത്തിന്റെ ചുമതലയുള്ള എഐസിസി ജനറല്‍ സെക്രട്ടറിയുമായ താരിഖ് അന്‍വര്‍ പറഞ്ഞത്.കേരളത്തിലെ തെരഞ്ഞെടുപ്പ് ഫലം ദേശീയ തലത്തില്‍ കോണ്‍ഗ്രസിനെ ബാധിക്കുമെന്നതിനാല്‍ തന്നെ ഇത്തവണ റിസ്‌ക് എടുക്കാനാവില്ലെന്നും അവസാന നിമിഷമുള്ള സ്ഥാനാര്‍ത്ഥി നിര്‍ണയം ഉണ്ടാവില്ലെന്നും താരിഖ് അന്‍വര്‍ പറഞ്ഞു.