തില്ലങ്കേരിയില്‍ ഇന്ന് വോട്ടെടുപ്പ്; കനത്ത സുരക്ഷ

കണ്ണൂര്‍ ജില്ലാ പഞ്ചായത്ത് തില്ലങ്കേരി ഡിവിഷനില്‍ ഇന്ന് വോട്ടെടുപ്പ് നടക്കുന്നത് കനത്ത സുരക്ഷയില്‍. ഹൈക്കോടതിയുടെ നിര്‍ദേശപ്രകാരമാണ് നടപടി. കള്ളവോട്ടും ബൂത്തുപിടിത്തവും തടയാന്‍ 64 ബൂത്തുകളിലും വീഡിയോ ചിത്രീകരണം ഏര്‍പ്പെടുത്താന്‍ ഇന്നലെ ഹൈക്കോടതി നിര്‍ദ്ദേശിച്ചിരുന്നു. ആറളം, തില്ലങ്കേരി പഞ്ചായത്തുകള്‍, അയ്യന്‍കുന്ന് പഞ്ചായത്തിലെ മൂന്ന്, പായം പഞ്ചായത്തിലെ രണ്ട്, മുഴക്കുന്ന് പഞ്ചായത്തിലെ ഏഴ് വാര്‍ഡുകള്‍ അടക്കം ആകെ 42 വാര്‍ഡുകളാണ് തില്ലങ്കേരി ഡിവിഷനിലുള്ളത്. പഞ്ചായത്ത് തിരഞ്ഞെടുപ്പില്‍ 26 വാര്‍ഡുകള്‍ എല്‍ഡിഎഫും 13 വാര്‍ഡുകള്‍ യുഡിഎഫും 3 വാര്‍ഡുകള്‍ ബിജെപിയും നേടിയിരുന്നു.

പുല്ലഴിയിലെ വോട്ടര്‍മാര്‍ ഇന്ന് പോളിങ് ബൂത്തിലേക്ക്

തൃശൂര്‍ കോര്‍പറേഷനിലെ 47-ാം ഡിവിഷനായ പുല്ലഴിയിലെ വോട്ടര്‍മാര്‍ ഇന്ന് പോളിങ് ബൂത്തിലേക്ക്. എല്‍ഡിഎഫ് സ്ഥാനാര്‍ഥി എം.കെ മുകുന്ദന്റെ മരണത്തെ തുടര്‍ന്ന് മാറ്റിവെച്ച തദ്ദേശ പൊതു തിരഞ്ഞെടുപ്പാണിത്. 6 സ്ഥാനാര്‍ഥികളാണ് മത്സര രംഗത്തുള്ളത്. 4533 വോട്ടര്‍മാരുള്ള ഡിവിഷനില്‍ 2101 പേര്‍ പുരുഷ വോട്ടര്‍മാരും 2432 പേര്‍ വനിതാ വോട്ടര്‍മാരുമാണ്. പുല്ലഴി ലിറ്റില്‍ ഫ്‌ലവര്‍ ഗേള്‍സ് സ്‌കൂളിലെ 3 ബൂത്തുകളിലാണ് പോളിങ് നടക്കുക. രാവിലെ 7 മുതല്‍ വൈകിട്ട് 6 വരെയാണ് വോട്ടിങ് സമയം. വൈകീട്ട് 5 മുതല്‍ 6 വരെ കൊവിഡ് രോഗികള്‍ക്ക് വോട്ട് ചെയ്യാം. ഡിവിഷനിലെ 16 കോവിഡ് ബാധിതര്‍ തപാല്‍ വോട്ട് രേഖപ്പെടുത്തിയിട്ടുണ്ട്. എം ടി ഐ യില്‍ സജ്ജമാക്കിയ കേന്ദ്രത്തില്‍ 22 നാണു വോട്ടെണ്ണല്‍ നടക്കുക.
ആര്‍ക്കും കേവല ഭൂരിപക്ഷമില്ലാത്ത തൃശൂര്‍ കോര്‍പറേഷനില്‍ ഏറെ നിര്‍ണായകമാണ് പുല്ലഴി ഡിവിഷനിലെ തെരഞ്ഞെടുപ്പ്. മൂന്ന് മുന്നണികളുടെയും പ്രധാന നേതാക്കളെല്ലാം ഒരുപോലെ മത്സരിച്ചാണ് പുല്ലഴിയില്‍ പ്രചരണത്തിനിറങ്ങിയത്. കഴിഞ്ഞ തവണ കൈവിട്ട പുല്ലഴി തിരിച്ചു പിടിക്കാമെന്ന പ്രതീക്ഷയിലാണ് യുഡിഎഫ്. സിറ്റിംഗ് സീറ്റും കോണ്‍ഗ്രസ് പാരമ്പര്യവും ഗുണം ചെയ്യുമെന്ന വിലയിരുത്തലിലാണ് ഇടത് മുന്നണി. ഇടത് വലത് മുന്നണികള്‍ ഭരിച്ച ഡിവിഷനില്‍ ഇത്തവണ ബിജെപിയും പ്രതീക്ഷ വയ്ക്കുന്നു.സിറ്റിങ് ഡിവിഷനാണെങ്കിലും, കഴിഞ്ഞ തവണ മാത്രമാണ് പുല്ലഴി ഇടതുപക്ഷത്തിന് ലഭിച്ചത്. നിലവില്‍ കോര്‍പ്പറേഷനില്‍ വിമതനുള്‍പ്പെടെ 25 പേരാണ് ഇടതുമുന്നണിക്കുള്ളത്. 23 യു.ഡി.എഫിനും ആറ് സീറ്റ് ബി.ജെ.പിക്കും. തൃശൂര്‍ കോര്‍പറേഷനില്‍ വിമതന്റെ പിന്തുണയോടെ ഭരണം പിടിച്ചിരിക്കുന്ന ഇടതുമുന്നണിക്ക് പുല്ലഴി ഡിവിഷനിലെ വിജയം അനിവാര്യമാണ്.