കാല്‍ നൂറ്റാണ്ട് പിന്നിടുമ്പോഴെങ്കിലും ഒരു അവസരം ലഭിക്കുമോ

നിയമസഭാ തെരഞ്ഞെടുപ്പില്‍ എല്ലാ രാഷ്ട്രീയ പാര്‍ട്ടികളും യുവ ജനങ്ങള്‍ക്കും വനിതകള്‍ക്കും സീറ്റ് നല്‍കാന്‍ മത്സരിക്കുമ്പോള്‍ മുസ്ലിം ലീഗ് എന്ത് നിലപാട് സ്വീകരിക്കും എന്നാണ് രാഷ്ട്രീയ കേരളം ഉറ്റു നോക്കുന്നത്. മുസ്ളിം ലീഗ് അംഗങ്ങളില്‍ പകുതിയിലേറെയും വനിതകളാണെന്നാണ് കണക്ക്. എന്നാല്‍ പാര്‍ലമെന്റ്, നിയമസഭ തെരഞ്ഞെടുപ്പുകളില്‍ പരിഗണിക്കുന്നില്ലെന്നാണ് വനിത ലീഗന്റെ ആക്ഷേപം. ഇതുസംബന്ധിച്ച് സംസ്ഥാന സമിതി തീരുമാനമെടുത്ത് നിവേദനം നല്‍കിയിട്ടും 25 വര്‍ഷമായി നേതൃത്വം കണ്ണു തുറന്നില്ലെന്ന് വനിത ലീഗ് പരാതിപ്പെടുന്നു.
1996ലെ നിയമസഭ തെരഞ്ഞെടുപ്പില്‍ വനിത ലീഗ് അധ്യക്ഷയായിരുന്ന കമറുന്നിസ അന്‍വറിനെ കോഴിക്കോട് സൗത്തില്‍ സ്ഥാനാര്‍ഥിയാക്കിയതു മാത്രമാണ് ഇതുവരെയുള്ള ചരിത്രം. അന്ന് അവര്‍ പരാജയപ്പെടുകയും ചെയ്തു.2011ലെ നിയമസഭ തെരഞ്ഞെടുപ്പില്‍ അന്നത്തെ വനിത ലീഗ് സംസ്ഥാന ജനറല്‍ സെക്രട്ടറിയും ഇപ്പോള്‍ ദേശീയ ജനറല്‍ സെക്രട്ടറിയുമായ അഡ്വ. നൂര്‍ബിന റഷീദിനെ കോഴിക്കോട് സൗത്തില്‍ സ്ഥാനാര്‍ഥിയാക്കാമെന്ന് അറിയിച്ചിരുന്നു. എങ്കിലും ഡോ. എം.കെ. മുനീറിനാണ് നറുക്കുവീണത്.
2016ലെ നിയമസഭ തെരഞ്ഞെടുപ്പിനു മുന്നോടിയായി ചേര്‍ന്ന വനിത ലീഗ് സംസ്ഥാന കമ്മിറ്റി ഇതുസംബന്ധിച്ച് പ്രമേയം പാസാക്കി പാണക്കാട്ട് ചെന്ന് നിവേദനം നല്‍കി. പരിഗണിക്കാമെന്ന ഉറപ്പുകേട്ട് പോന്നതല്ലാതെ ഒരു വനിതക്കും ഇടം ലഭിച്ചില്ല.കഴിഞ്ഞയാഴ്ച ചേര്‍ന്ന വനിത ലീഗ് സംസ്ഥാന കമ്മിറ്റി ഇതേ പ്രമേയം വീണ്ടും പാസാക്കി. നിവേദക സംഘം അടുത്ത ദിവസം പാണക്കാട്ട് എത്തി തങ്ങള്‍ക്ക് നേരിട്ട് നല്‍കും. ഇതിനും ഒരുപടി മുന്നേ എറിഞ്ഞ് യൂത്ത് ലീഗും എംഎസ്എഫും ലീഗിനു മുന്നില്‍ രേഖാമൂലം ആവശ്യം അറിയിച്ചു കഴിഞ്ഞിരിക്കുകയാണ്.എംഎസ്എഫ് ദേശീയ വൈസ് പ്രസിഡന്റ് അഡ്വ. ഫാത്തിമ തഹ്ലിയയെ ഇത്തവണ മത്സര രംഗത്തിറക്കുന്നുണ്ടെന്ന് റിപ്പോര്‍ട്ടുകള്‍ പുറത്ത് വന്നിരുന്നു. സോഷ്യല്‍ മീഡിയായിലൂടെ മുഖ്യമന്ത്രിയെ കടന്നാക്രമിച്ച് സംസ്ഥാന ശ്രദ്ധ നേടിയ യുവ നേതാവാണ് അഡ്വ. ഫാത്തിമ. രംഗം ചൂടുപിടിച്ചതോടെ ലീഗിന്റെ ഭാഗത്തുനിന്നും അനക്കം ഒന്നും ഇല്ലാതായി. വനിതകള്‍ക്ക് പ്രാതിനിധ്യം നല്‍കുന്നതിനെ കുറിച്ച് കഴിഞ്ഞ ദിവസം മാധ്യമ പ്രവര്‍ത്തകര്‍ മുസ്ലിം ലീഗ് സംസ്ഥാന ജനറല്‍ സെക്രട്ടറി കെ.പി.എ. മജീദിനോട് ചോദിച്ചപ്പോള്‍ അദേഹം പ്രതികരിച്ചത് കാലം മാറി വരികയല്ലേ, പഴയ കാലത്തെ പോലെയാണോ ഇപ്പോള്‍. പാര്‍ട്ടി ഇതുവരെ സ്ഥാനാര്‍ത്ഥിത്തത്തെ പറ്റി തീരുമാനിച്ചിട്ടില്ല,' നിങ്ങളെല്ലാം ശുഭപ്രതീക്ഷയില്ലേ എന്നാണ്.അത് പാര്‍ട്ടി കമ്മിറ്റി കൂടി തീരുമാനിക്കേണ്ട കാര്യമാണ്. ഞങ്ങളിതുവരെ അക്കാര്യത്തെ സംബന്ധിച്ച് ചര്‍ച്ച ആരംഭിച്ചിട്ടില്ല. ആരംഭിക്കാനിരിക്കുന്നതേയുള്ളൂ എന്നും പറഞ്ഞു.ഇത്തവണ 30 ഇടങ്ങളില്‍ മത്സരിക്കാന്‍ തയാറെടുക്കുന്ന പാര്‍ട്ടി ഇത്തവണ പരിഗണിക്കും എന്ന വിശ്വാസത്തിലാണ് വനിത ലീഗ് നേതാക്കള്‍.