ഉടുമ്പന്‍ചോലയ്ക്ക് പിന്നാലെ പീരുമേട് സീറ്റിനെ ചൊല്ലിയും കോണ്‍ഗ്രസില്‍ പിടിവലി

ഉടുമ്പന്‍ചോലയ്ക്ക് പിന്നാലെ പീരുമേട് സീറ്റിനെ ചൊല്ലിയും ഇടുക്കി കോണ്‍ഗ്രസില്‍ പിടിവലി. മുന്‍നിര നേതാക്കള്‍ക്കൊപ്പം യൂത്ത് കോണ്‍ഗ്രസ്- കെഎസ്യു നേതാക്കളും അവകാശവാദം ഉന്നയിച്ചു രംഗത്തെത്തിയിരിക്കുകയാണ്. ഒരു കാലത്ത് കോണ്‍ഗ്രസിന്റെ ശക്തികേന്ദ്രമായിരുന്ന പീരുമേട് കഴിഞ്ഞ മൂന്ന് തവണയായി സിപിഐക്കൊപ്പമാണ്.
സിറ്റിംഗ് എംഎല്‍എ ഇഎം അഗസ്തിയെ 2006ല്‍ തോല്‍പ്പിച്ച് തുടങ്ങിയ ഇഎസ് ബിജിമോള്‍ 2011ല്‍ ചരിത്രം ആവര്‍ത്തിച്ചു. 2016ല്‍ ഭൂരിപക്ഷം 314 വോട്ടിലൊതുങ്ങി. എങ്കിലും ഹാട്രിക് പൂര്‍ത്തിയാക്കി. അന്ന് തോറ്റ സിറിയക് തോമസ് തന്നെയാണ് ഇത്തവണയും കോണ്‍ഗ്രസിന്റെ പരിഗണനാ പട്ടികയിലെ ആദ്യ പേരുകാരന്‍. എന്നാല്‍ മണ്ഡലം പിടിച്ചെടുക്കാന്‍ കുറച്ചുകൂടി ഊര്‍ജ്ജസ്വലരായ ആരെങ്കിലും വരണമെന്നാണ് യൂത്ത് കോണ്ഗ്രസിന്റെയും- കെഎസ് യുവിന്റെയും ആവശ്യം.
കെഎസ്യു ജില്ലാ പ്രസിഡന്റ് ടോണി തോമസിന് പുറമെ, യൂത്ത് കോണ്‍ഗ്രസ് മുന്‍ ജില്ലാ പ്രസിഡന്റ് ബിജോ മാണിയും പരിഗണനയിലുണ്ട്. യുവാക്കളെ സ്ഥാനാര്‍ത്ഥികളാക്കണമെന്ന് ആവശ്യപ്പെട്ട് സാമൂഹ്യ മാധ്യമങ്ങളിലും പ്രവര്‍ത്തകര്‍ പോര് തുടങ്ങിയിട്ടുണ്ട്.