‘വീക്ഷണത്തിലെ ആദരാഞ്ജലി’; അതൃപ്തിയില്ലെന്നും സബ് എഡിറ്ററുടെ പിഴവെന്നും ചെന്നിത്തല, വിശദീകരണം തേടി കെപിസിസി

കാസര്‍ഗോഡ്: ഐശ്വര്യകേരള യാത്രയ്ക്ക് 'ആദരാഞ്ജലികള്‍' അര്‍പ്പിച്ചുള്ള കോണ്‍ഗ്രസ് മുഖത്രമായ വീക്ഷണം പത്രത്തിലെ പ്രയോഗത്തില്‍ പ്രതികരണവുമായി പ്രതിപക്ഷ നേതാവ് രമേശ് ചെന്നിത്തല. വീക്ഷണത്തിലെ ആദരാഞ്ജലി പ്രയോഗത്തില്‍ അതൃപ്തിയില്ല. സബ്എഡിറ്ററുടെ പിഴവ് മാത്രമാണ് സംഭവിച്ചത്.
ഇന്നത്തെ വീക്ഷണം പത്രത്തിലെ അവസാന പേജിലെ യാത്ര സ്‌പെഷ്യല്‍ സപ്‌ളിമെന്റില്‍ ആശംസകള്‍ക്ക് പകരമുള്ളത് നീളത്തില്‍ നിരവധി തവണ ആദരാജ്ഞലികളെന്നാണ്. പത്രം കണ്ടതിന് പിന്നാലെ കാസര്‍ഗോഡ് നിന്നും ചെന്നിത്തല വീക്ഷണം പ്രതിനിധികളെ വിളിച്ച് അതൃപ്തി അറിയിച്ചിരുന്നു. പരിശോധിക്കാന്‍ കെപിസിസിയോടും ആവശ്യപ്പെട്ടു. പിടി തോമസ് ഒഴിഞ്ഞശേഷം വീക്ഷണം എംഡി സ്ഥാനം കെവി തോമസിന് നല്‍കിയെങ്കിലും അദ്ദേഹം ഏറ്റെടുക്കാത്തതിനെ തുടര്‍ന്ന് കെപിസിസി ജനറല്‍ സെക്രട്ടറി ജെയ്‌സണ്‍ ജോസഫിനാണിപ്പോള്‍ ചുമതല.പുറത്തുള്ളൊരു ഏജന്‍സിയാണ് യാത്രക്ക് പിന്തുണ നല്‍കിക്കൊണ്ടുള്ള അവസാന പേജ് തയ്യാറാക്കിയത്. പക്ഷെ പ്രൂഫ് പരിശോധിക്കേണ്ടവര്‍ക്കടക്കം പാളിച്ചയുണ്ടായെന്ന് ജെയ്‌സണ്‍ സമ്മതിച്ചു. വീക്ഷണം പ്രതിനിധികളോട് വിശദീകരണം തേടിയെന്നും എംഡി അറിയിച്ചു.