ലോക്ക് ഡൗണിന് ശേഷം ആദ്യമായി കെ.എസ്.ആര്‍.ടി.സിയുടെ മാസവരുമാനം 100 കോടിയിലെത്തി

ലോക്ക് ഡൗണിന് ശേഷം ആദ്യമായി കെ.എസ്.ആര്‍.ടി.സിയുടെ മാസവരുമാനം 100 കോടിയിലെത്തി. ജനുവരി മാസം സര്‍വീസ് നടത്തി ലഭിച്ചത് 100 കോടി 46 ലക്ഷം രൂപയാണ്.കഴിഞ്ഞ അഞ്ച് മാസമായി സര്‍ക്കാര്‍ സഹായത്തിലാണ് കെ.എസ്.ആര്‍.ടി.സിയുടെ നിലനില്‍പ്പ്. ഓരോ മാസവും ശമ്പളവും പെന്‍ഷനുമായി 133 കോടി രൂപയാണ് സര്‍ക്കാര്‍ സഹായം. ലോക്ക് ഡൗണില്‍ നടുവൊടിഞ്ഞ കെ.എസ്.ആര്‍.ടി.സി.ക്ക് ജൂലൈ മാസത്തില്‍ സര്‍വീസ് നടത്തി കിട്ടിയത് 21.38 കോടി മാത്രമായിരുന്നു. അവിടെ നിന്നാണ് ജനുവരി മാസത്തില്‍ 100 കോടി കളക്ഷന്‍ നേടിയത്. 5000 സര്‍വീസുകള്‍ ഉണ്ടായിരുന്നയിടത്ത് ഇപ്പോള്‍ 3200 സര്‍വീസുകളേയുളളു. കൂടുതല്‍ സര്‍വീസുകള്‍ ആരംഭിക്കുമ്പോള്‍ പഴയ പ്രതിമാസ ശരാശരി വരുമാനമായ 180 കോടി രൂപയിലെത്തിക്കാന്‍ കഴിയുമെന്ന പ്രതീക്ഷയിലാണ് കോര്‍പ്പറേഷന്‍.വരുമാനം വര്‍ധിച്ചെങ്കിലും ജനുവരി മാസത്തെ ശമ്പളം നല്‍കിയിട്ടില്ല. സ്വിഫ്റ്റ് കമ്പനി രൂപീകരണം വൈകുന്നതിലെ അതൃപ്തി ചൂണ്ടിക്കാട്ടി ധനവകുപ്പ് ഫണ്ട് തടഞ്ഞുവച്ചിരിക്കുകയാണ്.