മൂത്ത കോണ്‍ഗ്രസിനോട് വീണ്ടും നിലപാട് കടുപ്പിച്ച് യൂത്ത് കോണ്‍ഗ്രസ്

കുറഞ്ഞത് 17 സീറ്റെങ്കിലും വേണം

നിയമസഭാ തെരഞ്ഞെടുപ്പില്‍ കോണ്‍ഗ്രസ് സീറ്റ് നിര്‍ണയത്തില്‍ നിലപാട് കടുപ്പിച്ച് യൂത്ത് കോണ്‍ഗ്രസ്. നിലവിലെ കമ്മിറ്റിയിലേയും കഴിഞ്ഞ കമ്മിറ്റിയിലേതുമായി 17 പേര്‍ക്കെങ്കിലും സീറ്റ് നല്‍കണമെന്നാണ് ആവശ്യം. ഘടകകക്ഷികള്‍ സ്ഥിരമായി തോല്‍ക്കുന്ന മണ്ഡലങ്ങള്‍ ഏറ്റെടുക്കണമെന്നും യൂത്ത് കോണ്‍ഗ്രസ് പാര്‍ട്ടി നേതൃത്വത്തെ അറിയിച്ചു.
എല്ലാ തെരഞ്ഞെടുപ്പുകളിലും യുവപ്രാതിനിധ്യം ആവശ്യപ്പെട്ട് കോണ്‍ഗ്രസില്‍ ഉയരുന്നതാണ് യൂത്ത് കോണ്‍ഗ്രസ് ശബ്ദം. എന്നാല്‍ വേണ്ടത്ര പരിഗണന കിട്ടാറില്ല. കഴിഞ്ഞ നിയമ സഭ തെരഞ്ഞെടുപ്പില്‍ അന്നത്തെ യൂത്ത് കോണ്‍ഗ്രസ് വൈസ് പ്രസിഡന്റ് സിആര്‍ മഹേഷ്, കെഎസ്‌യു പ്രസിഡന്റ് ആയിരുന്ന വിഎസ് ജോയി, എന്നിവരടക്കം എട്ട് പേര്‍ക്ക് മാത്രമാണ് സീറ്റ് നല്‍കിയത്. ആരും നിയമസഭയിലെത്തിയില്ല.
മുന്‍കാല ചരിത്രം ഇത്തവണ ആവര്‍ത്തിക്കരുതെന്നാണ് യൂത്ത് കോണ്‍ഗ്രസിലെ പൊതുവികാരം. സംസ്ഥാന പ്രസിഡന്റ് ഷാഫി പറമ്പിലിനും വൈസ് പ്രസിഡന്റ് കെ എസ് ശബരിനാഥനും പുറമെ സംസ്ഥാന വൈസ് പ്രസിഡന്റ് മാരായ റിജില്‍ മാക്കുറ്റി, റിയാസ് മുക്കോളി, എന്‍എസ് നുസൂര്‍, എസ് എം ബാലു, അഖിലേന്ത്യ സെക്രട്ടറി വിദ്യാ ബാലകൃഷ്ണന്‍, നാല് ജില്ലാ പ്രസിഡന്റ്മാര്‍ എന്നിവര്‍ക്ക് ജയസാധ്യയുള്ള സീറ്റ് ഉറപ്പിക്കാനാണ് തീരുമാനം.
മുന്‍ സംസ്ഥാന സെക്രട്ടറി സുനില്‍ ലാലൂരിനെ നാട്ടികയിലും, മുന്‍ മാവേലിക്കര പാര്‍ലെമെന്റ് പ്രസിഡന്റ് സജി ജോസഫിനെ കുട്ടനാട്ടിലും ഇറക്കണമെന്നാണ് യൂത്ത് കോണ്‍ഗ്രസിന്റെ ആവശ്യം. സ്ഥിരമായി ഘടകകക്ഷി തോല്‍ക്കുന്ന കുട്ടനാട് അടക്കമുള്ള സീറ്റുകള്‍ തിരിച്ചെടുത്ത് യുവാക്കളെ മത്സരിപ്പിക്കണമെന്ന് സംസ്ഥാന യൂത്ത് കോണ്‍ഗ്രസ് പാര്‍ട്ടി നേതൃത്വത്തോട് ആവശ്യപ്പെട്ടിട്ടുണ്ട്.