കെ സി ജോസഫിന്റെ പിൻമാറ്റം തിരുവഞ്ചൂരിന് പാര

കൂടുതൽ കാലം മത്‌സരിച്ച കോൺഗ്രസ് നേതാക്കൾ മാറി നിൽക്കണമെന്ന ഹൈക്കമാന്റ് നിർദേശം മനിലാക്കി ഇരിക്കൂർ എം എൽ എ കെ സി ജോസഫ് പിൻമാറുന്നത് കോൺഗ്രസിൽ പുതിയ ഗ്രൂപ്പ്കളികൾക്ക് തുടക്കമായി.
ബി ജെ പി യും സി പി എമ്മും പുതുമുഖങ്ങളെ ഇറക്കി കേരളത്തിൽ ചുവട് ഉറപ്പിക്കുമ്പോൾ തുടർച്ചായി മത്‌സരിക്കുന്ന മുതിർന്ന നേതാക്കൾ ഇത്തവണ മാറി നിൽക്കണം എന്നുള്ളതാണ് രാഹുൽ ഗാന്ധിയുടെയും ഹൈക്കമാന്റിന്റെയും നിലപാട്.
ഇക്കാര്യം കേരളത്തിൽ കോൺഗ്രസിനുവേണ്ടി സർവേ നടത്തുന്ന ഏജൻസികൾക്കും പ്രതികരണങ്ങളായി ലഭിച്ചിട്ടുണ്ട്. ഉമ്മൻചാണ്ടി, രമേശ് ചെന്നിത്തല, രണ്ടാം നിരയിലെ മുതിർന്ന നേതാവ് വി ഡി സതീശൻ എന്നിവർക്ക് മാത്രമാണ് നിലവിൽ ഇതിൽ ഇളവ് ലഭിക്കുക. മറ്റുള്ളവരുമായി അടുത്ത ദിവസം ഹൈക്കമാന്റ് ചർച്ച നടത്തും.
കെ സി ജോസഫ് മത്‌സരിക്കാതെ മാറിയാൽ തിരുവഞ്ചൂരിനും ആ നിലപാട് സ്വീകരിക്കേണ്ടിവരും, കോട്ടയത്തും, അടൂരുമായി തുടർച്ചയായി എം എൽ എ പദവിയിലാണ് അദ്ദേഹം. വാർത്തകൾ പ്രചരിച്ചതുപോലെ ഉമ്മൻചാണ്ടി കൂടി മാറി യുവ നേതാക്കൾക്ക് അവസരം ഒരുക്കിയാൽ പിന്നെ പിൻമാറുക മാത്രമാവും വഴി.
ഹൈക്കമാന്റ് പിൻതുണ ഉറപ്പിക്കാനായി തിരുവഞ്ചൂർ ശ്രമം നടത്തിയെങ്കിലും അതിൽ വിജയം ഉറപ്പായിട്ടില്ല. എക്കാലവും തിരുവഞ്ചൂരിന് വേണ്ടി നിന്നിട്ടുള്ള എ കെ ആന്റണി പോലും കൂടുതൽ പുതുമുഖങ്ങൾ വേണം എന്ന നിലപാടിലാണ്.
അതേ സമയം കോട്ടയം മണ്ഡലത്തിൽ മറ്റാർക്കും ജയസാധ്യതയില്ലന്ന പ്രചരണം കോൺഗ്രസിനുള്ളിൽ തിരുവഞ്ചൂർ സജീവമായി നടത്തുന്നുണ്ട്. യൂത്ത് കോൺഗ്രസ് ജില്ലാ പ്രസിഡന്റ് ചിന്റു കുര്യൻ ജോയിയുടെ പേരാണ് കോട്ടയം മണ്ഡലത്തിലേക്ക് ഹൈക്കമാന്റിന് മുന്നിൽ എത്തിയിരിക്കുന്നത്.
ജില്ലാ ആസ്ഥാനത്തുതന്നെ യുവ നേതാവിനെ മത്‌സരിപ്പിച്ചാൽ ജില്ലയിൽ മുഴുവൻ ട്രെൻഡ് ലഭിക്കുമെന്ന് ഇക്കൂട്ടർ പറയുന്നു .