ശബരിമല വിഷയത്തില്‍ പ്രതികരിക്കില്ല; യുഡിഎഫ് തന്ത്രത്തില്‍ വീഴേണ്ടെന്ന് സിപിഎം

ശബരിമല വിഷയത്തില്‍ പ്രതികരിക്കേണ്ടെന്ന് സിപിഎം. യുഡിഎഫ് തന്ത്രത്തില്‍ വീഴേണ്ട. വിഷയം കോടതിയുടെ പരിഗണനയിലാണ് ശബരിമല യുവതീ പ്രവേശനം ഉള്ളതെന്നതിനാലാണിത്. അതേസമയം മുസ്ലിം ലീഗിനെതിരായ വിമര്‍ശനം തുടരും. ജമാ അത്തെ ഇസ്ലാമിയുമായുള്ള ബന്ധത്തിന്റെ അടിസ്ഥാനത്തിലാണ് വിമര്‍ശനം. അത് മുസ്ലിങ്ങള്‍ക്കെതിരല്ലെന്നും സിപിഎം സംസ്ഥാന സെക്രട്ടേറിയേറ്റ് വിലയിരുത്തി.
ശബരിമല സ്ത്രീപ്രവേശന വിഷയത്തില്‍ സുപ്രീം കോടതി വിധി നടപ്പിലാക്കാനുള്ള തീരുമാനവുമായി മുന്നോട്ട് പോയ ഇടത് സര്‍ക്കാരിനേറ്റ തിരിച്ചടിയായി കൂടിയാണ് 2019 ലെ ലോക്‌സഭാ തെരഞ്ഞെടുപ്പ് ഫലത്തെ കണക്കാക്കിയത്. 20 ല്‍ 19 ഇടത്തും തോറ്റതിനാല്‍ കടുത്ത വിരുദ്ധ വികാരം ഈ വിഷയത്തില്‍ പ്രതികരിക്കാന്‍ പോയാല്‍ വീണ്ടും ജനങ്ങളുടെ എതിര്‍പ്പ് നേരിടേണ്ടി വരുമെന്നാണ് സിപിഎം കരുതുന്നത്.

നിയമസഭാ തെരഞ്ഞെടുപ്പിലെ സ്ഥാനാർത്ഥി നിർണയത്തിനുള്ള മാനദണ്ഡം സംബന്ധിച്ച് സിപിഎം സംസ്ഥാന സെക്രട്ടേറിയറ്റിൽ ഏകദേശ ധാരണ. രണ്ട് തവണ മത്സരിച്ചവർക്ക് വീണ്ടും അവസരം നൽകേണ്ടന്ന തീരുമാനം പരമാവധി നടപ്പാക്കാനാണ് സെക്രട്ടേറിയറ്റിൻ്റെ നിലവിലെ ധാരണ. അതേസമയം ഏതെങ്കിലും ഒരു മണ്ഡലത്തിൽ വിജയം ഉറപ്പാക്കാൻ സിറ്റിംഗ് എംഎൽഎ വീണ്ടും മത്സരിക്കേണ്ടതുണ്ടെങ്കിൽ അവിടെ വിട്ടുവീഴ്ച ചെയ്യാനും തീരുമാനമായിട്ടുണ്ട്. 

മുന്നണിവിപുലീകരണത്തിൻ്റെ ഭാഗമായി കേരള കോൺ​ഗ്രസ് ജോസ് കെ മാണി വിഭാ​ഗവും എൽജെഡിയും എൽഡിഎഫിലേക്ക് വന്നതിനാൽ അവ‍ർക്കായി സിറ്റിം​ഗ് സീറ്റുകൾ വിട്ടു കൊടുക്കാനും സീറ്റുകൾ വച്ചു മാറുന്നതടക്കമുള്ള വിട്ടുവീഴ്ചകൾ ചെയ്യുവാനും സംസ്ഥാന സെക്രട്ടേറിയറ്റ് തീരുമാനിച്ചിട്ടുണ്ട്. സ്ഥാനാർത്ഥി നിർണയം സംബന്ധിച്ച പ്രാഥമിക ചർച്ചകൾ മാത്രമാണ് സിപിഎം സംസ്ഥാന സെക്രട്ടേറിയറ്റിൽ ഇന്നു നടന്നത്. എൽഡിഎഫ് തെരഞ്ഞെടുപ്പ് പ്രചാരണ ജാഥകൾക്ക് ശേഷം സിപിഎം സെക്രട്ടേറിയറ്റ് ചേ‍‍ർന്ന് സ്ഥാനാ‍ർത്ഥി നിർണയത്തിൽ വ്യക്തത വരുത്താനാണ് സാധ്യത. രണ്ട് തവണ മത്സരിച്ചവർക്ക് വീണ്ടും അവസരം നൽകേണ്ടതില്ലെന്ന് തീരുമാനിച്ചതോടെ സിപിഎം സിറ്റിം​ഗ് എംഎൽഎമാരിൽ പല‍ർക്കും വീണ്ടും മത്സരിക്കാൻ അവസരം കിട്ടിയേക്കില്ല. അതേസമയം ധനമന്ത്രി തോമസ് ഐസക്, പൊതുമരാമത്ത് ജി.സുധാകരൻ തുടങ്ങിയവരുടെ കാര്യത്തിൽ ഈ നയം എളുപ്പം നടപ്പാക്കാനും പാർട്ടിക്ക് സാധിക്കില്ല.