കാപ്പന്റെ കാര്യം ഇന്ന് അറിയാം കോൺഗ്രസ് നേതാവ് എൻസിപി യിലേക്ക

പാല എം എൽ എ മാണി സി കാപ്പൻ ഇടതുമുന്നണിയിൽ തുടരുമോ എന്ന കാര്യത്തിൽ ഇന്ന് തീരുമാനം അറിയാം. ഇതിനിടെ കാപ്പനെ വെട്ടുന്നതിനായി മുതിർന്ന ഒരു കോൺഗ്രസ് നേതാവ് എൻ സി പി യിലേക്ക് എത്തുന്നതായി സചനകൾ പുറത്തുവന്നു കഴിഞ്ഞു.
ജോസ് കെ മാണി ഒഴിയുന്ന രാജ്യസഭാ സീറ്റാണ് അദ്ദേഹത്തിന്റെ ലക്ഷ്യം ഒപ്പം പാർട്ടിയുടെ സംസ്ഥാന പ്രസിഡന്റ് പദവിയും വാഗ്ദാനമുണ്ട്. ശശീന്ദ്രൻ വിഭാഗമാണ് ഈ ഓഫർ നൽകിയിരിക്കുന്നത്. അടുത്തുതന്നെ അദ്ദേഹം മുബൈയിൽ എത്തി പവാറിനെ കണ്ടേക്കും. പവാറുമായി നല്ല ബന്ധുള്ള ആളാണ് ഇദ്ദേഹം.
അതിനിടെ എൻസിപി ഇടതുമുന്നണിയിൽ തുടരുന്നതു സംബന്ധിച്ചു ദേശീയ അധ്യക്ഷൻ ശരദ് പവാറിന്റെ നിർണായക പ്രഖ്യാപനം രണ്ടു ദിവസത്തിനുള്ളിൽ ഉണ്ടാകും. ഇന്ന് ഇടതുമുന്നണി നേതൃത്വത്തെ കാര്യങ്ങൾ ധരിപ്പിക്കും. സംസ്ഥാന അധ്യക്ഷൻ ടി.പി. പീതാംബരൻ, മാണി സി. കാപ്പൻ എംഎൽഎ, മന്ത്രി എ.കെ. ശശീന്ദ്രൻ എന്നിവരുമായി നടത്തുന്ന ചർച്ചയ്ക്കു ശേഷം പവാർ തീരുമാനംഅറിയിക്കുമെന്നാണു കരുതുന്നത്.

തിങ്കളാഴ്ച രാത്രി ന്യൂഡൽഹിയിലെത്തിയ മാണി സി. കാപ്പൻ ടി.പി. പീതാംബരൻ എന്നിവർ ദേശീയ നേതാവ് പ്രഫുൽ പട്ടേലുമായി പ്രാരംഭ ചർച്ചകൾ നടത്തിയിരുന്നു. പാലാ സീറ്റിൽ വിട്ടുവീഴ്ച ചെയ്യേണ്ടതില്ലെന്ന് ഇരുവരും വീണ്ടും ധരിപ്പിച്ചു.

സിപിഎം ദേശീയ ജനറൽ സെക്രട്ടറി സീതാറാം യെച്ചൂരിയുമായി പവാർ ആശയവിനിമയം നടത്തിയതായും അറിയുന്നു. പക്ഷെ തന്റെ തീരുമാനം അദ്ദേഹം കാപ്പനുമായി പങ്കുവച്ചിട്ടില്ല. എൽഡിഎഫ് വിടേണ്ടതില്ലെന്ന നിലപാടിൽ ഉറച്ചു നിൽക്കുന്ന മന്ത്രി എ.കെ. ശശീന്ദ്രൻ കൂടി പങ്കെടുക്കുന്ന ചർച്ചയ്ക്കു ശേഷമാകും തീരുമാനം സി പി എം നേതൃത്വത്തെ അറിയിക്കുക.