കൊവിഡ് വീണ്ടും പിടിമുറുക്കുന്നു; നിയന്ത്രണങ്ങള്‍ കടുപ്പിച്ച് ഗള്‍ഫ് രാജ്യങ്ങള്‍

കൊവിഡ് കേസുകള്‍ വീണ്ടും വര്‍ധിച്ചതോടെ വിവിധ ഗള്‍ഫ് രാജ്യങ്ങള്‍ മുന്‍കരുതല്‍ നടപടികള്‍ ഊര്‍ജിതമാക്കി. കുവൈത്തില്‍ വിദേശികള്‍ക്ക് താത്കാലിക പ്രവേശനവിലക്കേര്‍പ്പെടുത്തി. ഞായറാഴ്ചമുതല്‍ രണ്ടാഴ്ചത്തേക്കാണ് വിലക്ക്. രാത്രി എട്ടുമുതല്‍ പുലര്‍ച്ചെ അഞ്ചുവരെ മാളുകളില്‍ ഉള്‍പ്പെടെ വ്യാപാര സ്ഥാപനങ്ങള്‍ പ്രവര്‍ത്തിക്കരുതെന്ന് മന്ത്രിസഭ ഉത്തരവിട്ടു. എന്നാല്‍ ഫാര്‍മസി, ഭക്ഷ്യോത്പന്നങ്ങള്‍ എന്നിവ വില്‍ക്കുന്ന സ്ഥാപനങ്ങള്‍ക്ക് ഇളവുണ്ട്. ഡെലിവറി സര്‍വീസുകളാകാം. കുവൈത്തില്‍ കൊവിഡ് വാക്‌സിനേഷന്‍ പുരോഗമിക്കുകയാണ്. കോവിഷീല്‍ഡ് വാക്‌സിന്റെ രണ്ടുലക്ഷം ഡോസ് തിങ്കളാഴ്ച കുവൈത്തില്‍ എത്തിച്ചു. ഏപ്രിലോടുകൂടി മൂന്നുലക്ഷം ഡോസ് കോവിഷീല്‍ഡ് വാക്‌സിന്‍ രാജ്യത്ത് എത്തിക്കാനാകുമെന്നാണ് വിലയിരുത്തല്‍. നിലവില്‍ ഫൈസര്‍ ബയോന്‍ടെക് വാക്‌സിന്‍ വിതരണം ചെയ്യുന്നുണ്ട്. കുവൈത്തില്‍ എത്തുന്ന വിമാനങ്ങളില്‍ 35 യാത്രക്കാരെന്നത് അനിശ്ചിതകാലത്തേക്ക് തുടരും.
സൗദിയില്‍ ഹോട്ടലുകളിലും വിവാഹ ഹാളുകളിലും നടക്കുന്ന എല്ലാ പരിപാടികള്‍ക്കും ആഭ്യന്തരമന്ത്രാലയം താത്കാലിക വിലക്കേര്‍പ്പെടുത്തി. വ്യാഴാഴ്ച രാത്രി പത്തുമുതലാണ് പുതിയ നിയന്ത്രണം. വിവാഹപ്പാര്‍ട്ടികള്‍ക്ക് ഒരുമാസവും വിനോദപരിപാടികള്‍ക്ക് 10 ദിവസവുമാണ് വിലക്കേര്‍പ്പെടുത്തിയത്. സിനിമാ തിയേറ്ററുകള്‍, വിനോദ കേന്ദ്രങ്ങളിലും ഭക്ഷണശാലകളിലും പ്രവര്‍ത്തിക്കുന്ന ഗെയിം സെന്ററുകള്‍, കായിക കേന്ദ്രങ്ങള്‍ എന്നിവ അടച്ചിടാനും നിര്‍ദേശം നല്‍കി. ഹോട്ടലുകളില്‍ നടക്കുന്ന കോര്‍പ്പറേറ്റ് യോഗങ്ങള്‍ ഉള്‍പ്പെടെയുള്ള പരിപാടികള്‍ക്കും ഒരുമാസം വിലക്കുണ്ട്. കോവിഡ് സ്ഥിതിഗതികള്‍ വിലയിരുത്തിയശേഷം ആവശ്യമെങ്കില്‍ വിലക്ക് നീട്ടുമെന്നാണ് വിവരം. പൊതുചടങ്ങുകളില്‍ അടുത്ത 10 ദിവസത്തേക്ക് 20 പേരെ മാത്രമേ പങ്കെടുപ്പിക്കാവൂ.
കഴിഞ്ഞ ചൊവ്വാഴ്ച ഇന്ത്യ, യു.എ.ഇ. അടക്കം 20 രാജ്യങ്ങളില്‍നിന്നുള്ള വിദേശികള്‍ക്ക് സൗദിയില്‍ പ്രവേശിക്കുന്നതിന് വിലക്കേര്‍പ്പെടുത്തിയിരുന്നു. എന്നാല്‍, ഈ രാജ്യങ്ങളില്‍നിന്നുള്ള സൗദി പൗരന്മാര്‍, വിദേശ നയതന്ത്രജ്ഞര്‍, ആരോഗ്യപ്രവര്‍ത്തകര്‍, ഇവരുടെ കുടുംബാംഗങ്ങള്‍ എന്നിവര്‍ക്ക് കൊവിഡ് മാനദണ്ഡങ്ങളോടെ രാജ്യത്തേക്ക് പ്രവേശിക്കാം. മക്ക, മദീന ഹറമുകളില്‍ എത്തുന്നവര്‍ക്ക് കൊവിഡ് നിയന്ത്രണം ഏര്‍പ്പെടുത്തിയിട്ടുണ്ട്. ശാരീരിക അകലം പാലിക്കുന്നില്ലെന്ന് കണ്ടെത്തിയാല്‍ പിഴചുമത്തും.

അടുത്തിടെ ഒട്ടേറെ കൊവിഡ് നിയമലംഘനങ്ങള്‍ കണ്ടെത്തിയതിനെത്തുടര്‍ന്ന് യു.എ.ഇ.യില്‍ നിയന്ത്രണങ്ങള്‍ കടുപ്പിച്ചു. ഫെബ്രുവരി 28 വരെ കടുത്ത നിയന്ത്രണങ്ങളാണ് ഏര്‍പ്പെടുത്തിയിരിക്കുന്നത്. ഹോട്ടലുകള്‍ 70 ശതമാനം ശേഷിയില്‍ മാത്രമേ പ്രവര്‍ത്തിക്കാവൂ. ബാറുകള്‍, പബ്ബുകള്‍ എന്നിവ താത്കാലികമായി അടച്ചിരിക്കണമെന്നും ദുബായ് ടൂറിസം കോര്‍പ്പറേറ്റ് സര്‍വീസസ് ആന്‍ഡ് ഇന്‍വെസ്റ്റ്മെന്റ് സി.ഇ.ഒ. അഹ്മദ് അല്‍ ഫലാസി പറഞ്ഞു. ദുബായിലെത്തുന്ന എല്ലാ യാത്രക്കാരും 72 മണിക്കൂറിനകമുള്ള കോവിഡ് നെഗറ്റീവ് സര്‍ട്ടിഫിക്കറ്റ് ഹാജരാക്കണം.

ഖത്തറില്‍ വ്യാഴാഴ്ചമുതല്‍ വിവാഹങ്ങള്‍ ഉള്‍പ്പെടെയുള്ള ഒത്തുചേരലുകള്‍ക്ക് നിയന്ത്രണം ഏര്‍പ്പെടുത്തി. സര്‍ക്കാര്‍, സ്വകാര്യ ഓഫീസുകളില്‍ 80 ശതമാനത്തില്‍ കൂടുതല്‍ പേര്‍ പാടില്ല. 20 ശതമാനം പേര്‍ വീട്ടിലിരുന്ന് ജോലി ചെയ്യണം. ഓഫീസ് മീറ്റിങ്ങുകളില്‍ 15 പേരില്‍ കൂടരുത്. പൊതുഗതാഗതസംവിധാനങ്ങളില്‍ ഉള്‍പ്പെടെ കടുത്ത നിയന്ത്രണമുണ്ട്.

സൗദി പ്രവേശനവിലക്ക്: പ്രവാസികളുടെ യാത്ര പ്രതിസന്ധിയില്‍

ദുബായ്: ഇരുപത് രാജ്യങ്ങളില്‍ നിന്നുള്ളവര്‍ക്ക് സൗദി പ്രവേശനവിലക്ക് ഏര്‍പ്പെടുത്തിയതോടെ ഇന്ത്യക്കാരുള്‍പ്പെടെയുള്ളവരുടെ യാത്രയാണ് പ്രതിസന്ധിയിലായത്. സൗദിയിലേക്ക് പോകാന്‍ യുഎഇയിലെത്തിയ മലയാളികളടക്കം ഒട്ടേറെപ്പേരാണ് അപ്രതീക്ഷിത യാത്രാവിലക്കില്‍ കുടുങ്ങിയത്. ദുബായിലെത്തി 14 ദിവസത്തോളം ഹോട്ടലുകളിലും മറ്റും താമസിച്ചിരുന്നവരാണ് അനിശ്ചിതത്വത്തിലായത്.
ക്വാറന്റീന്‍ പൂര്‍ത്തിയാക്കി കോവിഡ് നെഗറ്റീവ് സര്‍ട്ടിഫിക്കറ്റ് നേടിയ 600-ലേറെ മലയാളികള്‍ വിലക്ക് പ്രാബല്യത്തിലാകുന്നതിനു മുമ്പുതന്നെ വിമാനങ്ങളിലും ബസുകളിലുമായി അതിര്‍ത്തി കടന്നു. മഹാമാരിയേല്‍പ്പിച്ച ആഘാതത്തില്‍നിന്നു കരകയറാന്‍ പാടുപെടുമ്പോഴാണ് വീണ്ടും ആശങ്കയുണ്ടാക്കുന്നവിധം നിയന്ത്രണങ്ങള്‍ കടുക്കുന്നത്.