സി പി എം ഇളവ് ഡൽഹിയിൽ നിന്നല്ല; എം.എ. ബേബി.

സ്ഥാനാർഥി നിർണയ മാനദണ്ഡങ്ങളിൽ സിപിഎം ഇളവ് നൽകുന്നത് പ്രാദേശിക ഘടകങ്ങൾ പരിഗണിച്ചെന്ന് സിപിഎം പിബി അംഗം എം.എ. ബേബി.
മാനദണ്ഡം പറഞ്ഞശേഷം എല്ലാവർക്കും ഇളവ് നൽകില്ല. പോളിറ്റ് ്ബ്യൂറോയോ, പാർട്ടി സെന്ററോ ഇക്കാര്യത്തിൽ ഇടപെടില്ലന്ന വ്യക്തമായ സൂചനയാണ് എം എ ബേബി നൽകിയിരിക്കുന്നത്.

തുടർച്ചയായി രണ്ടുതവണ വിജയിച്ചവരെ ഒഴിവാക്കാനുള്ള തീരുമാനം സിപിഎം കർശനമായി നടപ്പാക്കുമെന്ന സൂചനയാണ് എം.എ. ബേബിയുടെ വാക്കുകളിൽ. യുഡിഎഫിൻറേതുപോലെ അക്കൊമഡേഷൻ രാഷ്ട്രീയമല്ല ഇടതുമുന്നണിയുടേത്. ഭരണത്തുടർച്ചയ്ക്കാണ് പ്രഥമപരിഗണന. അതിനുതകുന്ന സ്ഥാനാർഥികളെ അവതരിപ്പിക്കും. എന്നാൽ മാനദണ്ഡങ്ങൾ പാലിക്കും. ആവശ്യമെങ്കിൽ മാത്രമാകും ഇളവ്. താൻ നിയമസഭാ തിരഞ്ഞെടുപ്പിൽ മൽസരിക്കില്ലെന്നും എം.എ.ബേബി വ്യക്തമാക്കി.

മുന്നണിയിൽ പുതുതായെത്തിയ പാർട്ടികൾക്കായി സിപിഎം അടക്കം എല്ലാ ഘടകകക്ഷികളും സീറ്റ് വിട്ടുകൊടുക്കേണ്ടിവരും. സങ്കുചിത രാഷ്ട്രീയത്തിൻറെ ഭാഗമായി ശബരിമലയെ ദുരുപയോഗിക്കുകയാണ് യുഡിഎഫ് എന്നും എ.എ.ബേബി പറഞ്ഞു. സുപ്രീംകോടതിയുടെ പരിഗണനയിലുള്ള കേസിൽ വേണമെങ്കിൽ യുഡിഎഫിന് കക്ഷിചേരാം. ആവനാഴിയിലെ അമ്പുകൾ ഉപയോഗ ശൂന്യമായതിനാലാണ് യുഡിഎഫ് ശബരിമല പ്രയോഗിക്കുന്നതെന്നും ബേബി പറഞ്ഞു.