സംസ്ഥാന ബിജെപിയിലെ ഉള്‍പ്പോര്; ഇടപെട്ട് കേന്ദ്രനേതൃത്വം

സംസ്ഥാന ബിജെപിയിലെ ഉള്‍പ്പോരില്‍ ഇടപെട്ട് കേന്ദ്ര നേതൃത്വം. പ്രശ്‌നപരിഹാരത്തിനായി ദേശീയ ജനറല്‍ സെക്രട്ടറി അരുണ്‍ സിംഗിനെ നിയോഗിച്ചു. സംസ്ഥാന നേതൃത്വവുമായും ശോഭാ സുരേന്ദ്രനുമായും അരുണ്‍ സിംഗ് ചര്‍ച്ച നടത്തും. അതേസമയം നിയമസഭാ തെരഞ്ഞെടുപ്പ് ലക്ഷ്യമിട്ട് സിപിഎമ്മിന് പിന്നാലെ ബിജെപിയും ഗൃഹസമ്പര്‍ക്കത്തിന് രംഗത്തിറങ്ങിയിട്ടുണ്ട്.
ബിജെപി ദേശീയ അദ്ധ്യക്ഷന്‍ ജെ.പി.നദ്ദയുടെ കേരളാ സന്ദര്‍ശനത്തിന് പിന്നാലെയാണ് കേന്ദ്ര നേതൃത്വത്തിന്റെ ഇടപെടല്‍. ശോഭാ സുരേന്ദ്രന്റെ പരാതിയെത്തുടര്‍ന്നാണ് പാര്‍ട്ടി നടപടി. തെരഞ്ഞെടുപ്പിന് മുന്‍പായി പോരിന് ശമനമുണ്ടാക്കുകയാണ് അരുണ്‍സിംഗിനെ ഏല്‍പ്പിച്ചിരിക്കുന്ന ദൗത്യം.
ഇതിനിടെ അതേസമയം നിയമസഭാ തെരഞ്ഞെടുപ്പ് ലക്ഷ്യമിട്ട് സിപിഎമ്മിന് പിന്നാലെ ബിജെപിയും ഗൃഹസമ്പര്‍ക്കത്തിന് പദ്ധതി തയ്യാറാക്കി കഴിഞ്ഞു. ഇതിന്റെ ഭാഗമായി 17 അംഗ ബൂത്ത്തല കമ്മിറ്റികള്‍ക്ക് ഭവന സന്ദര്‍ശന ചുമതല നല്‍കും. ശബരിമല യുവതീ പ്രവേശന വിവാദം, സ്വര്‍ണ്ണക്കടത്ത്, പിന്‍വാതില്‍ നിയമനം എന്നിവ ചര്‍ച്ചയാക്കും. 4 പഞ്ചായത്തുകള്‍ ചേരുന്ന ക്ലസ്റ്ററുകളില്‍ തെരഞ്ഞെടുപ്പ് വരെ പൊതുപരിപാടികള്‍ സംഘടിപ്പിക്കും. കെ സുരേന്ദ്രന്റെ യാത്രയെത്താത്ത മണ്ഡലങ്ങളില്‍ പ്രത്യേകം സമ്മേളനങ്ങള്‍ക്കും ബിജെപി രൂപം നല്‍കിയിട്ടുണ്ട്.