നഷ്ടപരിഹാരതുകയുടെ പകുതി കെട്ടിവെയ്ക്കാന്‍ മരട് ഫ്ളാറ്റ് നിര്‍മാതാക്കള്‍ക്ക് സുപ്രിംകോടതിയുടെ മുന്നറിയിപ്പ്; ഇല്ലെങ്കില്‍ ജപ്തി നടപടി

മരടിലെ ഫ്ളാറ്റ് ഉടമകള്‍ക്ക് നല്‍കേണ്ട നഷ്ടപരിഹാരത്തുകയുടെ പകുതി ഉടന്‍ കെട്ടിവെയ്ക്കാന്‍ ഫ്ലാറ്റ് നിര്‍മ്മാതാക്കള്‍ക്ക് സുപ്രിംകോടതിയുടെ നിര്‍ദ്ദേശം. നഷ്ടപരിഹാരത്തുകയുടെ പകുതിയെങ്കിലും കെട്ടിവെച്ചില്ലെങ്കില്‍ റവന്യൂ റിക്കവറിയ്ക്ക് ഉത്തരവിടുമെന്നും ജസ്റ്റിസ് നവീന്‍ സിന്‍ഹ അധ്യക്ഷനായ ബെഞ്ച് താക്കീത് നല്‍കി. അടുത്ത ബുധനാഴ്ച്ചയ്ക്കുള്ളില്‍ തീരുമാനം കോടതിയെ രേഖാമൂലം അറിയിക്കണമെന്നും കോടതി ഫ്ളാറ്റ് നിര്‍മാതാക്കള്‍ക്ക് നിര്‍ദ്ദേശം നല്‍കി. 115 കോടി രൂപയാണ് ഫ്ളാറ്റ് ഉടമകള്‍ക്ക് നഷ്ടപരിഹാരമായി നല്‍കേണ്ടത്. സംസ്ഥാന സര്‍ക്കാര്‍ നല്‍കിയ പ്രാഥമിക നഷ്ടപരിഹാരത്തുകയായ 65 കോടി രൂപ ഉള്‍പ്പെടെയുള്ള കണക്കാണിത്. ഫ്ലാറ്റിന്റെ നാല് നിര്‍മാതാക്കളും കൂടി പ്രാഥമിക നഷ്ടപരിഹാരമായി 61.50 കോടി രൂപ നല്‍കണം. എന്നാല്‍ 4.89 കോടി രൂപ മാത്രമാണ് ആകെ ലഭിച്ചതെന്ന് ജസ്റ്റിസ് ബാലകൃഷ്ണന്‍ നായര്‍ സമിതി കോടതിയെ അറിയിച്ചു.
9.25 കോടി രൂപ നല്‍കേണ്ട ഗോള്‍ഡണ്‍ കായലോരത്തിന്റെ നിര്‍മാതാക്കള്‍ 2.89 കോടി മാത്രമാണ് നിലവില്‍ നല്‍കിയിട്ടുള്ളത്. 15.5 കോടി രൂപ നല്‍കേണ്ട ജയിന്‍ ഹൈസിംഗ് കണ്‍സ്ട്രക്ഷന്‍ നല്‍കിയത് രണ്ട് കോടി മാത്രമാണെന്നും സമിതി കോടതിയ്ക്കുമുന്നില്‍ പറഞ്ഞു. കേസ് അടുത്ത ബുധനാഴ്ച്ച കോടതി വീണ്ടും പരിശോധിക്കും. സംവിധായകന്‍ മേജര്‍ രവി നല്‍കിയ കോടതിയലക്ഷ്യ ഹര്‍ജിയില്‍ നഷ്ടപരിഹാരത്തിന്റെ കാര്യത്തില്‍ തീരുമാനമെടുത്തശേഷം വാദം കേള്‍ക്കാമെന്നും കോടതി പറഞ്ഞു.