നിശബ്ദയാക്കാന്‍ പറ്റില്ല’; കുവൈത്തില്‍ സ്ത്രീകളുടെ പ്രതിഷേധ ക്യാമ്പയിന്‍ ശക്തമാവുന്നു

കുവൈത്തില്‍ സ്ത്രീകള്‍ക്കെതിരെ നടക്കുന്ന ലൈംഗികാതിക്രമങ്ങള്‍ക്കെതിരെ സോഷ്യല്‍ മീഡിയയില്‍ നടക്കുന്ന ക്യാമ്പയിന്‍ ശക്തി പ്രാപിക്കുന്നു. പ്രശസ്ത കുവൈത്ത്-അമേരിക്കന്‍ ഫാഷന്‍ ബ്ലോഗറായ ആസിയ അല്‍ ഫരജ് ആണ് ക്യാമ്പയിന്‍ കൂടുതല്‍ ജനശ്രദ്ധയിലേക്ക് എത്തിച്ചിരിക്കുന്നത്. 20 ലക്ഷം ഫോളോവേഴ്സുള്ള ഇവരുടെ ഇന്‍സ്റ്റഗ്രാം പേജില്‍ ഇവര്‍ കഴിഞ്ഞ ദിവസം ഇതു സംബന്ധിച്ച് വീഡിയോ ചെയ്തിരുന്നു.ഇതിനോടൊപ്പം ലാന്‍ അസ്‌കത് ( എന്നെ നിശബ്ദയാക്കാന്‍ പറ്റില്ല') എന്ന ഇന്‍സ്റ്റഗ്രാം പേജും ക്യാമ്പയിനിന്റെ ഭാഗമായി കഴിഞ്ഞ ആഴ്ച നിര്‍മിച്ചു. കുവൈത്തിലെ ഒരു ഡോക്ടറായ ശൈമ ഷാമോ ആണ് ഈ പേജ് നിര്‍മ്മിച്ചത്. നിരവധി സ്ത്രീകള്‍ രാജ്യത്ത് തങ്ങള്‍ക്ക് നേരിടേണ്ടി വരുന്ന ദുരനുഭവങ്ങളെ പറ്റി ഈ പേജില്‍ തുറന്നു പറയുന്നുണ്ട്. ഇതിനകം എട്ടായിരത്തോളം പേര്‍ പേജ് ഫോളോ ചെയ്തിട്ടുണ്ട്.കുവൈറ്റിലെ യുഎസ് എംബസി ഉള്‍പ്പെടെ ക്യാമ്പയിന് പിന്തുണ പ്രഖ്യാപിച്ചിട്ടുണ്ട്.
കുവൈറ്റിലുള്ള പ്രവാസി സ്ത്രീകളുടെ പ്രശ്നങ്ങളും ക്യാമ്പയിനില്‍ വിഷയമാവുന്നുണ്ട്. തൊഴിലുടമയില്‍ നിന്നും നേരിടേണ്ടി വരുന്ന പീഡനങ്ങളില്‍ രാജ്യത്ത് നിരവധി വിദേശ സ്ത്രീകള്‍ ബുദ്ധുമുട്ടുന്നുണ്ടെന്ന് ക്യാമ്പയിനില്‍ അഭിപ്രായം ഉയരുന്നുണ്ട്.
പ്രവാസി സമൂഹം ദുര്‍ബലമാണ്. കുവൈത്ത് സ്ത്രീകള്‍ക്ക് ഒരിക്കലും മനസ്സിലാവാത്ത തരത്തില്‍ അവര്‍ ഉപദ്രവിക്കപ്പെടുന്നുണ്ട്,' ആസ്യ ഫരജ് ഇറക്കിയ വീഡിയോയില്‍ പറയുന്നു.ഈ രാജ്യത്തുള്ള എല്ലാ സ്ത്രീകള്‍ക്കും വേണ്ടിയാണ് ഈ പോരാട്ടം. കുവൈത്ത് ദേശീയത്വം ഉള്ളവര്‍ക്ക് മാത്രമല്ല,' വീഡിയോയില്‍ പറയുന്നു. അടുത്തിടെ ടുണിഷ്യയിലും ഈജിപ്തിലും സമാനമായ പ്രതിഷേധങ്ങള്‍ ഉയര്‍ന്നിരുന്നു.