‘സ്ത്രീ വോട്ടര്‍മാരെ ലക്ഷ്യമിട്ട് വര്‍ഗീയ നീക്കം’; പ്രതിരോധിക്കാനൊരുങ്ങി സിപിഎം

സംസ്ഥാനത്ത് സ്ത്രീ വോട്ടര്‍മാരെ ലക്ഷ്യമിട്ട് വര്‍ഗീയ ശക്തികള്‍ വലിയതോതില്‍ പ്രവര്‍ത്തിക്കുന്നതായി സിപിഎം വിലയിരുത്തല്‍. നിയമ സഭാ തെരഞ്ഞെടുപ്പില്‍ ഇക്കാര്യങ്ങള്‍ ശ്രദ്ധിക്കാന്‍ ജാഗ്രത പുലര്‍ത്തണമെന്നും പാര്‍ട്ടി ഘടകങ്ങള്‍ക്ക് നിര്‍ദ്ദേശം നല്‍കി. വനിതാ നേതാക്കളെ രംഗത്തിറക്കി നിയോജക മണ്ഡലാടിസ്ഥാനത്തില്‍ പരിശീലനം നല്‍കി രംഗത്തിറക്കാനാണ് ആലോചന.
തെരഞ്ഞെടുപ്പ് പ്രചാരണത്തില്‍ പ്രതിപക്ഷം ശബരിമല വിഷയം ഉയര്‍ത്തിപ്പിടിക്കുന്ന സാഹചര്യത്തിലാണ് തീരുമാനം. ശബരിമല വിഷയത്തിലെ വൈകാരിക നിലപാട് ലോക്സഭാ തെരഞ്ഞെടുപ്പിലെ തോല്‍വിക്കു പിന്നിലെ പ്രധാന കാരണങ്ങളിലൊന്നായി വിലയിരുത്തപ്പെടുന്നു. നാമജപ ഘോഷയാത്രയടക്കമുള്ള സ്ത്രീകളുടെ പ്രതിഷേധ സമരങ്ങളും ഇതില്‍ വലിയ സ്വാധീനമുണ്ടാക്കിയെന്നും കരുതുന്നു.
സര്‍ക്കാരിന്റെ ക്ഷേമപ്രവര്‍ത്തനങ്ങള്‍ മുന്‍നിര്‍ത്തി സ്ത്രീ വോട്ടര്‍മാരെ സ്വാധീനിക്കാനും പ്രവര്‍ത്തനങ്ങള്‍ നടത്തും. സൗജന്യങ്ങളും ആനുകൂല്യങ്ങളും ലഭിക്കുന്നവരില്‍ വലിയൊരു വിഭാഗം വയോജനങ്ങളാണ്. ഇവരെ നേരിട്ട് സന്ദര്‍ശിക്കാനും വോട്ട് ഉറപ്പിക്കാനും പ്രാദേശികമായി യോഗങ്ങള്‍ വിളിച്ചു ചേര്‍ക്കാനും തീരുമാനിച്ചിട്ടുണ്ട്. സാമൂഹ്യമാധ്യമങ്ങളിലും സ്ത്രീ വോട്ടര്‍മാര്‍ക്കായുള്ള പ്രവര്‍ത്തന പദ്ധതികള്‍ നടത്തു. പല മേഖലകളിലുള്ള മുന്‍ എസ്എഫ്ഐ പ്രവര്‍ത്തകരെ ഇതിനായി ഉപയോഗിക്കും.