പുനീത് രാജ്കുമാറിന് കണ്ണീരോടെ വിട;

അച്ഛനരികില്‍ 'അപ്പുവിന്' അന്ത്യവിശ്രമം കഴിഞ്ഞ ദിവസം അന്തരിച്ച കന്നഡ 'പവര്‍ സ്റ്റാര്‍' പുനീത് രാജ്കുമാറിന്റെ സംസ്‌കാര ചടങ്ങുകള്‍ പൂര്‍ത്തിയായി. അച്ഛന്‍ രാജ്കുമാര്‍ അന്ത്യവിശ്രമം കൊള്ളുന്നതിന് അരികിലായി കണ്ഠീരവ സ്റ്റുഡിയോയില്‍ ആണ് പുനീതിനും അന്ത്യവിശ്രമം ഒരുക്കിയത്. പുലര്‍ച്ചെ നാലു മണിക്ക് കണ്ഠീരവ സ്റ്റേഡിയത്തിലെ പൊതുദര്‍ശനം അവസാനിപ്പിച്ചു. തുടര്‍ന്നു വിലാപയാത്രയായി 11 കിലോമീറ്റര്‍ അകലെയുള്ള സ്റ്റുഡിയോയിലേക്ക് കൊണ്ടുപോയി. 7.30ന് ആണു സംസ്‌കാര ചടങ്ങുകള്‍ പൂര്‍ത്തിയായത്. അമേരിക്കയിലുള്ള മകള്‍ ശനിയാഴ്ച രാത്രിയോടെയാണ് ബെംഗളൂരുവില്‍ എത്തിയത്. പുനീതിന്റെ അന്ത്യകര്‍മങ്ങള്‍ക്ക് സാക്ഷ്യം വഹിക്കാന്‍ ആരാധകരെല്ലാം എത്തുന്നത് ക്രമസമാധാന പ്രശ്‌നം ഉണ്ടാക്കുമെന്ന സര്‍ക്കാരിന്റെ അഭ്യര്‍ഥന കണക്കിലെടുത്താണ് കുടുംബം സംസ്‌കാര ചടങ്ങുകള്‍ പുലര്‍ച്ചെ മാറ്റിയത്. അടുത്ത കുടുംബാംഗങ്ങള്‍ക്ക് പുറമെ മുഖ്യമന്ത്രി ബസവരാജ് ബൊമ്മെ, മുന്‍ മുഖ്യമന്ത്രി സിദ്ധരാമയ്യ, മന്ത്രിമാര്‍, കന്നഡ സിനിമയിലെ പ്രമുഖ നടീനടന്മാര്‍ തുടങ്ങിയവരും പങ്കെടുത്തു. വെള്ളിയാഴ്ചയാണ് പുനീത് രാജ്കുമാര്‍ (46) ഹൃദയാഘാതത്തെ തുടര്‍ന്ന് മരിച്ചത്. ജിമ്മില്‍ വ്യായാമം ചെയ്യുന്നതിനിടെ നെഞ്ചുവേദനയുണ്ടായി. ഉടന്‍ തന്നെ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. വെള്ളിയാഴ്ച 4 മണിക്ക് ആരംഭിച്ച പൊതുദര്‍ശനത്തില്‍ രണ്ടു ലക്ഷം പേര്‍ താരത്തിന് അന്ത്യാഞ്ജലി അര്‍പ്പിച്ചുവെന്നാണ് കണക്ക്. കന്നഡ സിനിമയിലെ പ്രമുഖ താരങ്ങളെല്ലാം നേരിട്ടെത്തി അന്തിമോപചാരം അര്‍പ്പിച്ചു.