കേരളത്തില്‍ ഗ്രൂപ്പ് അനുവദിക്കില്ല; ബി.ജെ.പി. നേതാക്കള്‍ക്ക് കേന്ദ്ര ഘടകത്തിന്റെ മുന്നറിയിപ്പ്

പാര്‍ട്ടിയില്‍ ഒരുതരത്തിലുമുള്ള ഗ്രൂപ്പുപ്രവര്‍ത്തനം അനുവദിക്കില്ലെന്നു സംസ്ഥാനത്തെ നേതാക്കള്‍ക്ക് ബി.ജെ.പി. കേന്ദ്രഘടകത്തിന്റെ മുന്നറിയിപ്പ്. കേഡര്‍ നേതാക്കളും മാസ് നേതാക്കളും വേണം. ഗ്രൂപ്പ് വേണ്ടാ. എല്ലാവരെയും ഉള്‍പ്പെടുത്തിയും ഒറ്റക്കെട്ടായും മുന്നോട്ടുപോകണമെന്ന് സംസ്ഥാന നേതൃയോഗത്തില്‍ ദേശീയ സംഘടനാ സെക്രട്ടറി ബി.എല്‍. സന്തോഷ് നിര്‍ദേശം നല്‍കി. തിരഞ്ഞെടുപ്പ് പരാജയത്തിന്റെ പേരില്‍ ആര്‍ക്കും സ്ഥാനമാറ്റമുണ്ടാകില്ലെന്നും അദ്ദേഹം വ്യക്തമാക്കി. എന്നാല്‍, പുനഃസംഘടനയുടെ ഭാഗമായി ഇനിയും മാറ്റങ്ങള്‍ ഉണ്ടാകാമെന്ന് അദ്ദേഹം സൂചന നല്‍കി. സംസ്ഥാന അധ്യക്ഷന്‍ കെ. സുരേന്ദ്രന്റെ സ്ഥാനം ഉറച്ചതാണെന്ന തരത്തിലായിരുന്നു യോഗത്തിന്റെ പോക്ക്. എല്ലാവരെയും ഉള്‍പ്പെടുത്തിയും മുതിര്‍ന്ന നേതാക്കളുടെ അനുഭവസമ്പത്ത് പ്രയോജനപ്പെടുത്തിയും മുന്നോട്ടുപോകാന്‍ സന്തോഷ് ആവശ്യപ്പെട്ടു. മുതിര്‍ന്നവര്‍ പ്രധാനവും ബഹുമാനിക്കപ്പെടേണ്ടതുമാണെങ്കിലും ഗുണത്തിനാണ് പ്രാധാന്യം. അച്ചടക്കനടപടി അവസാനത്തെ നീക്കമാണ്. പാര്‍ട്ടി ചുമതലയുള്ള പ്രഭാരിമാര്‍ ചടങ്ങുകളില്‍ പങ്കെടുത്ത് ഫോട്ടോയെടുത്തു മടങ്ങരുത്. അവിടെ തങ്ങി പാര്‍ട്ടിയെ ശക്തിപ്പെടുത്താന്‍ ജോലിചെയ്യണം -സന്തോഷ് ആവശ്യപ്പെട്ടു. സന്തോഷിന്റെ സാന്നിധ്യത്തില്‍ യോഗത്തില്‍ പങ്കെടുത്തവര്‍ വിമര്‍ശനത്തിന് തയ്യാറായില്ല. സംസ്ഥാന ചുമതലയുള്ള പ്രഭാരി സി.പി. രാധാകൃഷ്ണനും യോഗത്തില്‍ പങ്കെടുത്തു. ഇന്ധനവില കുതിക്കുന്നത് പാര്‍ട്ടിക്ക് ദോഷംചെയ്യുമെന്നു ചര്‍ച്ചയില്‍ പങ്കെടുത്തവര്‍ അഭിപ്രായപ്പെട്ടു. ജില്ലകളില്‍ സഹപ്രഭാരിമാര്‍ വരുന്നു പാര്‍ട്ടി പോഷകഘടകങ്ങളുടെയും ജില്ലകളിലെയും പ്രഭാരിമാരെ മാറ്റി പുതിയ നേതാക്കളെ നിശ്ചയിച്ചു. ഇനിമുതല്‍ ജില്ലകളില്‍ സഹപ്രഭാരിമാരുണ്ടാകും. ഇതോടെ പാര്‍ട്ടിയുടെ സംഘടനാചുമതലയുള്ള പ്രഭാരിമാരുടെ എണ്ണം കൂടും. 140 മണ്ഡലം കമ്മിറ്റികളും വിഭജിക്കാനുള്ള തീരുമാനം അംഗീകരിച്ചതോടെ ഭാരവാഹികളുടെ എണ്ണവും ഇരട്ടിക്കും. നിലവിലെ മണ്ഡലം ഭാരവാഹികള്‍ തുടരുമെന്ന് ഉറപ്പില്ല. അടുത്ത ദിവസംമുതല്‍ മണ്ഡലം കമ്മിറ്റികള്‍ വിഭജിച്ച് ഭാരവാഹികളെ നിശ്ചയിക്കുന്നതിലേക്ക് പാര്‍ട്ടി കടക്കും. ജില്ലാപ്രസിഡന്റുമാര്‍, ഉപസമിതി ഭാരവാഹികള്‍ തുടങ്ങിയവരുടെ യോഗവും ബുധനാഴ്ച നടന്നു.