പാര്‍ട്ടി യോഗത്തിലെ വിമര്‍ശനങ്ങള്‍ക്ക് വാര്‍ത്താ സമ്മേളനത്തിലൂടെ മറുപടി; കെ സുധാകരനെതിരെ എ,ഐ ഗ്രൂപ്പുകള്‍

കെപിസിസി യോഗത്തിലെ വിമര്‍ശനങ്ങള്‍ക്ക് വാര്‍ത്താസമ്മേളനത്തില്‍ മറുപടി നല്‍കിയ കെ.സുധാകരന്റെനടപടിയില്‍ എ ഐ ഗ്രൂപ്പുകള്‍ക്ക് കടുത്ത അതൃപ്തി.നേതൃത്വത്തിന്റെ ഏകാധിപത്യശൈലിയുടെ ഉദാഹരണമാണ് അധ്യക്ഷന്റെ നടപടി എന്നാണ് കുറ്റപ്പെടുത്തല്‍. സുധാകരനെതിരെ പരസ്യമായി നേതാക്കള്‍ രംഗത്ത് എത്താനും സാധ്യതയുണ്ട്. സംഘടനാ തെരഞ്ഞെടുപ്പ് പ്രഖ്യാപിച്ചിരിക്കെ പുനസംഘടനാ നിര്‍ത്തിവെക്കണമെന്നായിരുന്നു കെപിസിസി വിശാല നേതൃയോഗത്തിലെ എ-ഐ ഗ്രൂപ്പുകളുടെ വിമര്‍ശനം. യുണിറ്റ് കമ്മിറ്റികള്‍ സുധാകരന്‍ അനുകൂലികള്‍ കയ്യടക്കുകയാണെന്നും കുറ്റപ്പെടുത്തലുണ്ടായി. വിമര്‍ശനങ്ങള്‍ക്ക് സുധാകരനും യോഗത്തില്‍ മറുപടി നല്‍കി. പക്ഷെ യോഗത്തിലെ വിമര്‍ശനം ഉന്നയിച്ചവരെ വാര്‍ത്താസമ്മേളനത്തില്‍ സുധാകരന്‍ രൂക്ഷമായി കുറ്റപ്പെടുത്തിയതാണ് പുതിയ വിവാദം. വിമര്‍ശകര്‍ക്ക് ജനപിന്തുണയില്ലെന്നതടക്കമുള്ള പരസ്യനിലപാടിലാണ് മുതിര്‍ന്ന നേതാക്കള്‍ക്ക് അടക്കം അമര്‍ഷം പാര്‍ട്ടിക്കുള്ളില്‍ പോലും ആരോഗ്യകരമായ ചര്‍ച്ച വേണ്ടെന്ന നിലപാട് നേതൃത്വം പിന്തുടരുന്ന ഏകാധിപത്യശൈലിയുടെ തുടര്‍ച്ചയാണെന്നാണ് വിമര്‍ശനം. മാത്രമല്ല നേതൃയോഗത്തില്‍ പുനസംഘടനയുടെ കാര്യത്തില്‍ ഹൈക്കമാന്‍ഡ് അന്തിമതീരുമാനം എടുക്കട്ടെ എന്ന് പറഞ്ഞ കെപിസിസി അധ്യക്ഷന്‍ പിന്നീട് നിലപാട് മാറ്റി ഹൈക്കമാന്‍ഡിന്റെ അംഗീകാരമുണ്ടെന്നും പുനസംഘടനയുമായി മുന്നോട്ട് പോകുമെന്നും പ്രഖ്യാപിച്ചത് ശരിയായില്ലെന്നും നേതാക്കള്‍ പറയുന്നു. കെപിസിസി പുനഃസംഘടനാ വിവാദത്തില്‍ എതിര്‍പ്പ് ഉണ്ടെങ്കിലും പരസ്യപോര് ഗ്രൂപ്പുകള്‍ മാറ്റിയിരിക്കുകയായിരുന്നു. പക്ഷെ പുതിയ സാഹചര്യത്തില്‍ സുധാകരന് മറുപടി നല്‍കണം എന്ന നിലപാടിലാണ് ഗ്രൂപ്പുകള്‍