കുട്ടികളുടെ നല്ലഭാവിക്കായി പൂജ, സഹോദരിമാരെ അടച്ചിട്ട മുറിയില്‍ പീഡിപ്പിച്ചു; 61-കാരന് 25 വര്‍ഷം തടവ്

പ്രായപൂര്‍ത്തിയാകാത്ത സഹോദരിമാരായ മൂന്നു പെണ്‍കുട്ടികളെ പൂജകളുടെ പേരില്‍ ലൈംഗിക പീഡനത്തിനിരയാക്കിയ 61-കാരന് 25 വര്‍ഷം തടവുശിക്ഷ. കരൂര്‍ ജില്ലയിലെ അരുങ്കപാളയത്തിന് സമീപമുള്ള വെങ്കമേടുള്ള ഗണപതിയ്ക്കാണ് രണ്ടുവര്‍ഷംമുമ്പ് രജിസ്റ്റര്‍ചെയ്ത കേസില്‍ കരൂര്‍ ഫാസ്റ്റ്ട്രാക്ക് മഹിളാ കോടതി ജഡ്ജി നസീമഭാനു ശിക്ഷവിധിച്ചത്. ഇതു കൂടാതെ 1.60 ലക്ഷംരൂപ പിഴ ഈടാക്കാനും ഉത്തരവിട്ടു. തുക കുട്ടികള്‍ക്ക് നല്‍കണം. സര്‍ക്കാര്‍ 2.60 ലക്ഷംരൂപ വീതം സഹായധനം നല്‍കാനും കോടതി ഉത്തരവിട്ടു. സമീപവാസികളായ 10, 12, 13 വയസ്സുള്ള പെണ്‍കുട്ടികളെ ഗണപതി ഒരു വര്‍ഷത്തോളം പീഡിപ്പിക്കുകയായിരുന്നു. ഒരോ കുട്ടിക്കുനേരെയുള്ള പീഡനവും പ്രത്യേകം കേസുകളായി പരിഗണിച്ചാണ് മൂന്ന് കേസുകളിലായി 25 വര്‍ഷം തടവുശിക്ഷ വിധിച്ചത്. കുട്ടികളുടെ അച്ഛന്‍ നേരത്തെ മരിച്ചതാണ്. വീട്ടില്‍ പൂജകളും മതപ്രഭാഷണവും നടത്തിയിരുന്ന ഗണപതിയെ കാണാന്‍ ഒട്ടേറെ ഭക്തര്‍ എത്താറുണ്ടായിരുന്നു. മക്കള്‍ക്ക് നല്ല ഭാവിയുണ്ടാകുന്നതിനായി പൂജകളും പ്രാര്‍ഥനകളും നടത്താനായി അമ്മയാണ് ഗണപതിയെ സമീപിച്ചത്. പൂജകളുടെ പേരില്‍ കുട്ടികളെ പ്രത്യേകം മുറിയില്‍ അടച്ചിട്ട് പീഡിപ്പിച്ചുവരികയായിരുന്നു. കുട്ടികളില്‍നിന്ന് വിവരം അറിഞ്ഞതിനെത്തുടര്‍ന്ന് അമ്മ പോലീസില്‍ പരാതി നല്‍കുകയായിരുന്നു.