മഴ: ശബരിമലയില്‍ അടുത്ത 4 ദിവസം നിയന്ത്രണം; സ്‌പോട് ബുക്കിങ് ഒഴിവാക്കും

മഴ കനത്തതിനെ തുടര്‍ന്ന് ശബരിമലയില്‍ അടുത്ത നാല് ദിവസം നിയന്ത്രണം. സ്‌പോട് ബുക്കിങ് ഒഴിവാക്കും. വെര്‍ച്വല്‍ ക്യൂ വഴി ബുക്ക് ചെയ്തവര്‍ക്കു തീയതി നീട്ടി നല്‍കും. മുഖ്യമന്ത്രി ഉള്‍പ്പെട്ട അവലോകന യോഗത്തിലാണു തീരുമാനം. മണ്ഡല- മകരവിളക്ക് തീര്‍ഥാടനത്തിനായി തിങ്കളാഴ്ചയാണ് നട തുറക്കുക. നട തുറക്കുമ്പോള്‍ കൂടുതല്‍ തീര്‍ഥാടകര്‍ പ്രവേശിക്കുന്നത് ഇപ്പോഴത്തെ അവസ്ഥയില്‍ പ്രയാസം സൃഷ്ടിക്കും. മഴ ശക്തമായതിനാല്‍ നദിയില്‍ കലക്കവെള്ളമാണുള്ളത്. കുടിവെള്ളത്തിന്റെയും കുളിക്കാനുള്ള വെള്ളത്തിന്റെയും മറ്റും ലഭ്യതയില്‍ കുറവു വരും. അതിനാലാണ് അടുത്ത 3-4 ദിവസങ്ങളില്‍ ആളുകളുടെ എണ്ണം നിയന്ത്രിക്കാന്‍ അവലോകന യോഗത്തില്‍ തീരുമാനിച്ചത്. ജലനിരപ്പ് അപകടകരമായതിനാല്‍ പമ്പാസ്‌നാനം അനുവദിക്കില്ല. മറ്റ് കുളിക്കടവുകളിലും ഇറങ്ങരുത്. സ്‌പോട് ബുക്കിങ് നിര്‍ത്തും. ആളുകളുടെ എണ്ണം നിയന്ത്രിക്കാന്‍ വെര്‍ച്വല്‍ ക്യൂ വഴി ബുക്ക് ചെയ്തവര്‍ക്ക് തീയതി മാറ്റി നല്‍കുന്ന കാര്യം പരിഗണിക്കണം എന്നും മുഖ്യമന്ത്രി പറഞ്ഞു.