മോഡലുകളുടെ അപകടമരണം: ഹോട്ടലുടമ ചോദ്യംചെയ്യലിന് ഹാജരായി; ദൃശ്യങ്ങള്‍ നിര്‍ണായകം

ദേശീയ പാതയില്‍ മുന്‍ മിസ്‌കേരള ഉള്‍പ്പടെ മൂന്നുപേര്‍ അപകടത്തില്‍ മരിച്ച സംഭവവുമായി ബന്ധപ്പെട്ട് ഇവര്‍ ഡിജെ പാര്‍ട്ടിയില്‍ പങ്കെടുത്ത ഹോട്ടല്‍ നമ്പര്‍ 18 ഉടമ റോയ് ജെ. വയലാട്ട് പൊലീസിനു മുമ്പാകെ ചോദ്യം ചെയ്യലിനു ഹാജരായി. എറണാകുളം സൗത്ത് സ്റ്റേഷനില്‍ സൗത്ത് എസിപിയുടെ നേതൃത്വത്തിലാണ് ചോദ്യം ചെയ്യല്‍. ഇന്നലെ റോയ് ഡിസിപി ഓഫിസിലെത്തി നോട്ടീസ് കൈപ്പറ്റിയിരുന്നു. തുടര്‍ന്ന് ഇന്നുരാവിലെ 10 മണിക്കുശേഷം ഹാജരാകുകയായിരുന്നു. റോയിയെ ചോദ്യം ചെയ്യുന്നതോടെ പെണ്‍കുട്ടികളുടെ മരണത്തില്‍ എന്തെങ്കിലും ദുരൂഹതയുണ്ടെങ്കില്‍ കണ്ടെത്താനാകുമെന്നാണ് പൊലീസ് കരുതുന്നത്. ഹോട്ടലിനുള്ളില്‍ നിന്നുള്ള സിസിടിവി ദൃശ്യങ്ങള്‍ നശിപ്പിക്കാന്‍ റോയ് ജീവനക്കാര്‍ക്കു നിര്‍ദേശം നല്‍കിയ വാട്‌സാപ് സന്ദേശം പൊലീസ് കണ്ടെത്തിയിരുന്നു. ഇതേതുടര്‍ന്ന് ഇവ എവിടെയാണ് ഒളിപ്പിച്ചിരിക്കുന്നത് എന്ന് അറിയുന്നതിനാണ് പൊലീസ് ചോദ്യം ചെയ്യലിനു വിളിപ്പിച്ചിരിക്കുന്നത്. റോയിയുടെ ഉടമസ്ഥതയിലുള്ള നമ്പര്‍ 18 ഹോട്ടലില്‍നിന്ന് രാത്രി 12 മണിക്കു ശേഷം പോയപ്പോഴാണ് മോഡലുകള്‍ അപകടത്തില്‍പെട്ടത്. ഹോട്ടലില്‍ നിന്നുള്ള കാര്‍ ഇവരെ പിന്തുടര്‍ന്നെന്നു കണ്ടെത്തിയതോടെ അവിടെ പരിശോധന നടത്തുകയും വാഹനത്തിന്റെ ഡ്രൈവറുടെ മൊഴിയെടുക്കുകയും ചെയ്തിരുന്നു. മദ്യപിച്ചു വാഹനം ഓടിക്കേണ്ട എന്നു പറയുന്നതിനാണ് പിന്തുടര്‍ന്നത് എന്നാണ് ഡ്രൈവര്‍ ആവര്‍ത്തിച്ചു പൊലീസിനോടു പറഞ്ഞിരിക്കുന്നത്. നിലവില്‍ റോയ് ജെ. വയലാട്ടിനെ പൊലീസ് കേസില്‍ പ്രതി ചേര്‍ത്തിട്ടില്ല. എന്നാല്‍ ചോദ്യം ചെയ്യലില്‍ അസ്വഭാവികമായി എന്തെങ്കിലും കണ്ടെത്തിയാല്‍ കേസെടുക്കുന്നതു പരിഗണിക്കുമെന്നാണ് അറിയുന്നത്. ഹോട്ടലിന്റെ കോറിഡോറില്‍ നിന്നുള്ള ദൃശ്യങ്ങള്‍ മാത്രമാണ് പൊലീസിനു ലഭിച്ചിരിക്കുന്നത്. കാര്‍ പാര്‍ക്കിങ്ങിലെയോ ഹോട്ടലിനകത്തെയോ ദൃശ്യങ്ങള്‍ ലഭിച്ചിട്ടില്ല. ഇവ ലഭിച്ചാല്‍ മാത്രമേ അസ്വഭാവികമായി എന്തെങ്കിലും സംഭവിച്ചിട്ടുണ്ടോ എന്നതില്‍ വ്യക്തത വരികയുള്ളൂ.