കൊച്ചിയില്‍ മോഡലുകള്‍ മരിച്ചതില്‍ ദുരൂഹത; കേസ് അന്വേഷിക്കാന്‍ പുതിയ സംഘം വരുന്നു

ദേശീയപാതാ ബൈപ്പാസില്‍ മോഡലുകള്‍ മരിച്ച സംഭവത്തിനു പിന്നിലെ ദുരൂഹത അന്വേഷിക്കാന്‍ പുതിയ സംഘം വരുന്നു. ജില്ലാ ക്രൈംബ്രാഞ്ച് എസിപി ബിജി ജോര്‍ജിനാണ് അന്വേഷണ ചുമതല. അന്വേഷണ സംഘത്തില്‍ ആരെല്ലാമെന്ന കാര്യത്തില്‍ ഉടന്‍ തീരുമാനമുണ്ടാകും. സൗത്ത് എസിപി നിസാമുദീന്റെ നേതൃത്വത്തില്‍ കെ.അനന്തലാലാണ് നിലവില്‍ കേസ് അന്വേഷിക്കുന്നത്. ഉദ്യോഗസ്ഥനെതിരെ കഴിഞ്ഞ ദിവസം പ്രതിപക്ഷം ഉള്‍പ്പെടെ ആക്ഷേപം ഉന്നയിച്ചതിനു പിന്നാലെയാണ് അന്വേഷണം ക്രൈംബ്രാഞ്ചിനെ ഏല്‍പ്പിക്കാനുള്ള സര്‍ക്കാര്‍ തീരുമാനം. കേസ് അന്വേഷണത്തിന്റെ ഭാഗമായി ഹോട്ടലില്‍ ഡിജെ പാര്‍ട്ടിയില്‍ പങ്കെടുത്തവരുടെ മൊഴി പൊലീസ് രേഖപ്പെടുത്തുന്നുണ്ട്. പാര്‍ട്ടിയില്‍ പങ്കെടുത്ത കൂടുതല്‍ പേരെ കണ്ടെത്താനാണ് ശ്രമം. പാര്‍ട്ടിക്കെത്തിയവരുടെ പേരു വിവരങ്ങള്‍ ഹോട്ടലില്‍ രേഖപ്പെടുത്തിയിട്ടില്ല. മാത്രമല്ല, മുറി നല്‍കിയവരുടെ വിവരങ്ങള്‍ പോലും ഹോട്ടലില്‍ ലഭ്യമല്ല എന്ന് അന്വേഷണ സംഘം കണ്ടെത്തി. അന്നു രാത്രി പാര്‍ട്ടിയില്‍ പങ്കെടുത്തെന്നു വ്യക്തമായ പലരും ഇതിനകം ഒളിവില്‍ പോയിട്ടുണ്ട് എന്നാണ് വിവരം. പൊലീസ് അറസ്റ്റു ചെയ്ത റോയ് വയലാട്ടിനെ ഇന്നു കോടതിയില്‍ ഹാജരാക്കാനിരിക്കെ, രക്തസമ്മര്‍ദം ഉയര്‍ന്നതിനെ തുടര്‍ന്ന് ആശുപത്രിയില്‍ പ്രവേശിപ്പിച്ചു. എറണാകുളം കളമശേരി മെഡിക്കല്‍ കോളജ് ആശുപത്രിയിലാണ് ഇയാള്‍ ഉള്ളത്. ആരോഗ്യ നില മെച്ചപ്പെടുന്നത് അനുസരിച്ചായിരിക്കും കോടതിയില്‍ ഹാജരാക്കുക. ഇയാള്‍ക്കൊപ്പം അറസ്റ്റിലായ 5 ജീവനക്കാരെ ഇന്ന് കോടതിയില്‍ ഹാജരാക്കും. ഇവരുടെ പ്രാഥമിക മൊഴിയെടുക്കല്‍ പൂര്‍ത്തിയാക്കി. ഇവരാണ് റോയിയുടെ നിര്‍ദേശപ്രകാരം ഹാര്‍ഡ് ഡിസ്‌കുകള്‍ കായലില്‍ എറിഞ്ഞുകളഞ്ഞത്. ഹാര്‍ഡ് ഡിസ്‌കുകള്‍ കായലില്‍ ഉപേക്ഷിച്ചെന്ന മൊഴി പ്രകാരം അന്വേഷണ സംഘം ഇവരെ സ്ഥലത്തെത്തിച്ച് തെളിവെടുപ്പു നടത്തിയിരുന്നു. പ്രതികളുടെ വാട്‌സാപ് സന്ദേശങ്ങള്‍ പരിശോധിച്ചതില്‍ റോയിയുടെ നിര്‍ദേശപ്രകാരമാണ് ഹാര്‍ഡ് ഡിസ്‌ക് ഉപേക്ഷിച്ചതെന്ന് പൊലീസ് കണ്ടെത്തി. ഇതേ തുടര്‍ന്നാണ് തെളിവു നശിപ്പിച്ചതിന്റെ പേരില്‍ ഇവര്‍ക്കെതിരെ കേസെടുത്ത് അറസ്റ്റു ചെയ്തിരിക്കുന്നത്. ഡിജെ പാര്‍ട്ടിക്കിടെ സംഭവിച്ചത് എന്താണ്, ആരെല്ലാമാണ് പാര്‍ട്ടിക്ക് ഉണ്ടായിരുന്നത് എന്ന കാര്യങ്ങളില്‍ നിര്‍ണായകമാകുന്ന ദൃശ്യങ്ങളാണ് പ്രതികള്‍ നശിപ്പിച്ചത്. എന്നാല്‍ പാര്‍ട്ടിയില്‍ പങ്കെടുത്തവരില്‍നിന്ന് പരമാവധി വിവരങ്ങള്‍ ശേഖരിക്കാനാണ് പൊലീസ് നീക്കം.