ദുരുദ്ദേശ്യത്തോടെ റോയി മദ്യംനല്‍കി, ഉദ്ദേശ്യം നടക്കാതെവന്നപ്പോള്‍ വഴക്ക്; നമ്പര്‍ 18ല്‍ നടന്നതെന്ത്?

മുന്‍ മിസ് കേരളയ്ക്കും സുഹൃത്തുക്കള്‍ക്കും നമ്പര്‍ 18 ഹോട്ടല്‍ ഉടമ റോയിയെ മുന്‍ പരിചയമുണ്ടെന്ന് പോലീസ്. പോലീസിന്റെ കസ്റ്റഡി അപേക്ഷയിലാണിത് പറയുന്നത്. ഹോട്ടലില്‍ ഡി.ജെ. പാര്‍ട്ടിക്കായി ഒത്തുകൂടിയ മുന്‍ മിസ് കേരള അന്‍സി കബീര്‍, മിസ് കേരള മുന്‍ റണ്ണറപ്പ് അന്‍ജന ഷാജന്‍, അബ്ദുള്‍ റഹ്മാന്‍ എന്നിവരുമായി റോയി പരിചയം പുതുക്കിയെന്നാണ് അപേക്ഷയിലുള്ളത്. സംഘത്തിലുണ്ടായിരുന്ന കെ.എ. മുഹമ്മദ് ആഷിഖിനെ മാത്രമാണ് റോയി ആദ്യമായി പരിചയപ്പെടുന്നത്. മുന്‍ പരിചയം വെച്ച് അന്‍സി കബീറിനും സുഹൃത്തുക്കള്‍ക്കും ഡി.ജെ. നടന്ന സ്ഥലത്തുവെച്ചോ ഒന്ന്, രണ്ട് നിലയില്‍ വെച്ചോ മദ്യമോ മയക്കുമരുന്നോ റോയി കൊടുത്തെന്നാണ് സംശയം. പാര്‍ട്ടിയില്‍ വെച്ച് ദുരുദ്ദേശ്യത്തോടെ ഇവര്‍ക്ക് മദ്യം അമിതമായി റോയി നല്‍കിയെന്നും പോലീസ് പറയുന്നു. റോയിയുടെ താത്പര്യങ്ങള്‍ നടക്കാതെ വന്നപ്പോള്‍ വഴക്കുണ്ടാവുകയും മിസ് കേരള അടങ്ങുന്ന സംഘം ഹോട്ടലില്‍നിന്ന് പുറത്തേക്ക് പോരുകയുമായിരുന്നെന്നാണ് സംശയം. അതെ സമയം കേസില്‍ തേവര കണ്ണങ്ങാട്ട് പാലത്തിനടിയില്‍ കായലില്‍ ക്രൈംബ്രാഞ്ച് തിരച്ചില്‍ നടത്തും. അഗ്‌നിരക്ഷാ സേനയുടെ സ്‌കൂബ ടീമിന്റെ സഹായത്തോടെയാകും ഇത്. ഇതിനായി ക്രൈംബ്രാഞ്ച് സഹായം തേടിയിട്ടുണ്ട്. എന്നാല്‍, സി.സി.ടി.വി. ദൃശ്യങ്ങളുടെ ഹാര്‍ഡ് ഡിസ്‌ക് കായലില്‍ കളഞ്ഞു എന്നത് പോലീസിനെ പറ്റിക്കാന്‍ പറഞ്ഞതാണോ എന്നും സംശയമുണ്ട്. ഹോട്ടലിലെ ഒന്നാം നില, രണ്ടാം നില, പാര്‍ക്കിങ് ഏരിയ എന്നിവിടങ്ങളിലെ സി.സി.ടി.വി. ദൃശ്യങ്ങളാണ് റോയിയും സംഘവും മാറ്റിയത്. ഇവിടെ അസ്വാഭാവികമായി എന്തോ നടന്നിട്ടുണ്ടെന്നാണ് കരുതുന്നത്. ദൃശ്യങ്ങള്‍ അടങ്ങിയ ഹാര്‍ഡ് ഡിസ്‌ക് അഴിക്കുന്നതിനുള്ള രീതി ടെക്‌നീഷ്യന്‍ വാട്സാപ്പ് വഴി അയച്ചുനല്‍കി. ഇതുപ്രകാരം ഹോട്ടലിലെ ജോലിക്കാര്‍ ഡി.വി.ആറില്‍നിന്ന് ഹാര്‍ഡ് ഡിസ്‌ക് അഴിച്ചുമാറ്റി പകരം കാലിയായ ഹാര്‍ഡ് ഡിസ്‌ക് സ്ഥാപിക്കുകയായിരുന്നു. അഴിച്ചെടുത്ത ഹാര്‍ഡ് ഡിസ്‌ക് ഹോട്ടലുടമയുടെ നിര്‍ദേശപ്രകാരം പിന്നീട് കായലില്‍ വലിച്ചെറിഞ്ഞെന്നാണ് മൊഴി.