‘ഹലാൽ ഫുഡ്’ ഒരു ഭീകരജീവിയുമല്ല.

ഹലാൽ എന്നാൽ അനുവദനീയമായത് എന്നാണർത്ഥം. വിഹിതമായത് എന്നും പറയാം. ഹലാലിൻ്റെ വിപരീതമാണ് 'ഹറാം'. അനുവദനീയമല്ലാത്തതും അവിഹിതമായതും എന്നാണ് ഉദ്ദേശ്യം. ഇസ്ലാം ഒരു ജീവിത വ്യവസ്ഥയാണ്. ജീവിതത്തിൻ്റെ എല്ലാ മേഖലയിലും അത് നിയമ-നിർദേശങ്ങൾ നൽകുന്നുണ്ട്. എല്ലാ കാര്യത്തിലും ഹലാലും ഹറാമും അഥവാ അനുവദനീയമായതും നിഷിദ്ധമായതും ശ്രദ്ധിക്കണമെന്ന് അത് നിഷ്കർഷിക്കുന്നു. ഭക്ഷണം, വസ്ത്രം, പാർപ്പിടം തുടങ്ങി എല്ലാം അനുവദനീയവും വിഹിതവുമായ മാർഗത്തിലൂടെ സമ്പാദിച്ചതായിരിക്കണം, അല്ലെങ്കിൽ അത് ഹലാൽ അല്ല. ഭക്ഷണം അനുവദനീയമായ മാർഗത്തിൽ സമ്പാദിച്ചതാവണം, അതോടൊപ്പം നല്ലതുമായിരിക്കണം. അപ്പോഴേ അത് ഹലാൽ ആവുകയുള്ളൂ' ശവം, രക്തം, പന്നിമാംസം, അല്ലാഹു അല്ലാത്തവരുടെ പേരിൽ അറുത്തത്, പരസ്പരം പോരടിച്ച് കുത്തി ചത്തത്, ശ്വാസംമുട്ടി ചത്തത് തുടങ്ങിയ പരിമിതമായ ചില വസ്തുക്കൾ മാത്രമാണ് ഖുർആൻ നിഷിദ്ധം (ഹറാം) എന്നു പറഞ്ഞത്. ബാക്കിയെല്ലാം ഹലാൽ അഥവാ അനുവദിക്കപ്പെട്ടതാണ്. മനുഷ്യനെ നശിപ്പിക്കുന്ന മദ്യവും മറ്റു ലഹരി വസ്തുക്കളും ഇതിൻ്റെ കൂടെ നിഷിദ്ധമാക്കിയിരിക്കുന്നു. ഭക്ഷണത്തിൽ തുപ്പുന്നത് പോയിട്ട് ഊതാൻ പോലും പാടില്ലെന്നാണ് ഇസ്ലാമിക നിയമം. ആരെങ്കിലും അങ്ങനെ എന്തെങ്കിലും ചെയ്യുന്നുവെങ്കിൽ അവരുടെ അറിവില്ലായ്‌മയാണ്. വസ്ത്രത്തിലും ഹലാൽ-ഹറാം നിയമങ്ങളുണ്ട്. വസ്ത്രധാരണത്തിൻ്റെ പ്രധാന ഉദ്ദേശ്യം നാണം മറക്കലാണ്. അതിനുതകാത്ത നഗ്നത വെളിപ്പെടുന്ന വസ്ത്രം ഹലാൽ അല്ല. മനുഷ്യൻ്റെ അടിസ്ഥാന ആവശ്യങ്ങളിലൊന്നായ ലൈംഗികതയും ഇണചേരലും വിഹിതമായ മാർഗത്തിലായിരിക്കണം. അപ്പോഴേ അത് ഹലാൽ ആവൂ. അവിഹിതം ഹറാമാണ്. ഇക്കാര്യങ്ങളിലൊക്കെ ഹലാൽ - ഹറാം പരിധികൾ മുസ്ലിംകൾ പാലിക്കുന്നു. പക്ഷെ, അത് ആരുടെ മേലും അവർ അടിച്ചേൽപ്പിക്കുന്നില്ല. എങ്കിൽ അതുകൊണ്ട് ആർക്കെന്തു പ്രശ്നം?!