‘ദത്ത് വിഷയത്തില്‍ ഷിജൂ ഖാന് തെറ്റുപറ്റിയിട്ടില്ല’; കുറ്റം തെളിയും വരെ പിന്തുണയെന്ന് സിപിഐഎം

തിരുവനന്തപുരത്ത് അമ്മയറിയാതെ കുഞ്ഞിനെ ദത്ത് നല്‍കിയ സംഭവത്തില്‍ ശിശുക്ഷേമ സമിതി ജനറല്‍ സെക്രട്ടറി ഷിജൂ ഖാന് തെറ്റുപറ്റിയിട്ടില്ലെന്ന് സിപിഐഎം ജില്ലാ സെക്രട്ടറി ആനാവൂര്‍ നാഗപ്പന്‍. കുഞ്ഞിനെ ദത്ത് നല്‍കിയതില്‍ ശിശുക്ഷേമ സമിതിക്കോ ഷിജൂ ഖാനോ വീഴ്ച്ച സംഭവിച്ചെന്ന് കരുതുന്നില്ലെന്നും ആനാവൂര്‍ നാഗപ്പന്‍ പറഞ്ഞു. നിയമ വിരുദ്ധമായി എന്തെങ്കിലും ചെയ്തെന്ന് റിപ്പോര്‍ട്ട് ലഭിക്കാതെ അവരെ കുറ്റക്കാരെന്ന് പറയാനാവില്ല. തെറ്റ് കോടതിയില്‍ തെളിയുന്നതു വരെ ഷിജു ഖാന് പാര്‍ട്ടി പിന്തുണ നല്‍കുമെന്നും ആനാവൂര്‍ നാഗപ്പന്‍ വ്യക്തമാക്കി. 'കുഞ്ഞിനെ നിയമപരമായി ദത്ത് നല്‍കുന്നതിന് മുമ്പുവരെ ശിശുക്ഷേമ സമിതിക്ക് മുമ്പില്‍ യാതൊരു പരാതിയും ഉണ്ടായിരുന്നില്ല. നിയമപരമായി ദത്ത് കൊടുത്തതിന് ശേഷം കോടതി മുഖേനയായിരിക്കും നടപടികള്‍. ശിശുക്ഷേമ സമിതിയുടെ ഭാഗത്ത് നിന്നും നിയമവിരുദ്ധമായി യാതൊന്നും നടന്നിട്ടില്ലെന്നാണ് വിശ്വസിക്കുന്നത്.' അമ്മയ്ക്ക് കുഞ്ഞിനെ കിട്ടുക എന്നത് മൗലീകമായ അവകാശമാണെന്നും ആനാവൂര്‍ നാഗപ്പന്‍ വ്യക്തമാക്കി. അതേസമയം വനിത ശിശുക്ഷേമ വകുപ്പ് ഡയറക്ടര്‍ ടി വി അനുപമയുടെ റിപ്പോര്‍ട്ടിലെ പരാമര്‍ശങ്ങളെ കുറിച്ചറിയില്ല. റിപ്പോര്‍ട്ട് കോടതിയില്‍ വന്നതിന് ശേഷമേ ആരുടെയെങ്കിലും ഭാഗത്ത് വീഴ്ച്ചയുണ്ടായെന്ന് സ്ഥിരീകരിക്കാന്‍ സാധുക്കുവെന്നും അദ്ദേഹം കൂട്ടിച്ചേര്‍ത്തു.