അങ്ങിനെ പുല്ലമ്പാറ ഡിജിറ്റൽ ഗ്രാമമാകുന്നു…

വെറ്റിലയില്‍ ചുണ്ണാമ്പു തേയ്ക്കുമ്പോലെ ആന്‍ഡ്രോയിഡ് ഫോണിന്റെ ഡിസ്പ്ലയില്‍ തോണ്ടി സ്വയം വീഡിയോകോള്‍ ചെയ്ത് വിദേശത്തുള്ള മക്കളോടും കൊച്ചുമക്കളോടും സംസാരിച്ചും സന്തോഷം പങ്കിട്ടും ഓരോ വയോധികരായ അമ്മമാരും, അപ്പൂപ്പന്‍മാരുമൊക്കെ കേരളത്തിലെ ഒരു ഉള്‍നാടന്‍ ഗ്രാമത്തില്‍ നിന്ന് ഡിജിറ്റല്‍ ലോകത്തിലേക്ക് നടന്നു കയറുന്ന കഴ്ചകളാല്‍ പുല്ലമ്പാറയും ഡിജിറ്റല്‍ ലോകത്ത് വിസ്മയങ്ങള്‍ തീര്‍ക്കുകയാണ്. ഒരു ഗ്രാമത്തിലെ മുഴുവന്‍ ആളുകളും മൊബൈല്‍ ഫോണ്‍ സാക്ഷരത കൈവരിക്കാനുള്ള തീവ്ര ശ്രമത്തിലാണ്. രാജ്യത്തെ ആദ്യത്തെ ഡിജിറ്റല്‍ ഗ്രാമപഞ്ചയത്താവനൊരുങ്ങുകയാണ് വെഞ്ഞാറമൂട് പുല്ലമ്പാറ ഗ്രാമപഞ്ചായത്ത്. ഇതിന്റെ മൂന്നാംഘട്ട പരിശീലനമാണ് ഇപ്പോള്‍ നടക്കുന്നത്. പഞ്ചായത്തിലെ 14 വയസ്സിന് മുകളിലുള്ള എല്ലാവരേയും സ്മാര്‍ട്ട് ഫോൺ ഉപയോഗിക്കാൻ പഠിപ്പിക്കുകയാണ് ഈ നാട്. വന്ദ്യവയോധികര്‍ വരെ വിദേശങ്ങളിൽ ഉള്ള മക്കള്‍ക്ക് സ്വയം വീഡിയോകോള്‍ ചെയ്തും സെല്‍ഫിയെടുത്തും പറഞ്ഞറിയിക്കാനാവാത്ത ആവശത്തോടെ ഡിജിറ്റല്‍ സാക്ഷരതയിലേക്ക് അഭിമാനത്തോടെ ചുവടുവച്ചിരിക്കുന്നു. 15 വാര്‍ഡുകളുള്ള പുല്ലമ്പാറയിലെ 7 വാര്‍ഡുകളില്‍ പരിശീലനം പുരോഗമിക്കുകയാണ്. മറ്റ് വാര്‍ഡുകളില്‍കൂടി പരിശീലനം പൂര്‍ത്തിയാകുന്നതോടെ പുല്ലമ്പാറ കേരളത്തിലെ ആദ്യ ഡിജിറ്റല്‍ ഗ്രാമമായി മാറും. വാർത്ത: സലിമോന്‍