രാജ്യത്ത് ഏറ്റവും കുറവ് ദരിദ്രര്‍ കേരളത്തില്‍; കൂടുതല്‍ ബിഹാറിലെന്ന് നിതി ആയോഗ്

രാജ്യത്ത് ദാരിദ്ര്യം ഏറ്റവും കുറഞ്ഞ സംസ്ഥാനം കേരളമെന്ന് നിതി ആയോഗിന്റെ റിപ്പോര്‍ട്ട്. നിതി ആയോഗ് പുറത്തിറക്കിയ ആദ്യത്തെ ദാരിദ്ര്യ സൂചികയില്‍ (എംപിഐ) ബിഹാര്‍, ജാര്‍ഖണ്ഡ്, ഉത്തര്‍ പ്രദേശ് എന്നിവയാണ് ദാരിദ്ര്യം കൂടുതലുള്ള സംസ്ഥാനങ്ങള്‍. കണക്കുകള്‍ പ്രകാരം ബിഹാറിലെ ജനസംഖ്യയുടെ 51.91 ശതമാനവും ദാരിദ്ര്യം അനുഭവിക്കുന്നവരാണ്. ജാര്‍ഖണ്ഡില്‍ ഇത് 42.16 ശതമാനവും ഉത്തര്‍ പ്രദേശില്‍ 37.79 ശതമാനവുമാണ്. പട്ടികയില്‍ നാലാം സ്ഥാനത്തുള്ള മധ്യപ്രദേശില്‍ 36.65 ശതമാനം പേരാണ് ദരിദ്രരായിട്ടുള്ളത്. അഞ്ചാം സ്ഥാനത്തുള്ള മേഘാലയയിലാകട്ടെ 32.67 ശതമാനം ആളുകളും. പട്ടികയില്‍ ഏറ്റവും പിന്നിലുള്ള കേരളത്തില്‍ ആകെ ജനസംഖ്യയുടെ 0.71 ശതമാനം ആളുകള്‍ മാത്രമാണ് ദരിദ്രര്‍. തൊട്ടുമുന്നിലുള്ള സംസ്ഥാനങ്ങളുടെ കണക്ക് ഇങ്ങനെയാണ്: ഗോവ- 3.76%, സിക്കിം- 3.82%, തമിഴ്‌നാട്- 4.89%, പഞ്ചാബ്- 5.59%. കേന്ദ്രഭരണ പ്രദേശങ്ങളില്‍ ദാദ്ര ആന്‍ഡ് നാഗര്‍ ഹവേലി (27.36%), ജമ്മു കശ്മീര്‍, ലഡാക്ക് (12.58%), ദാമന്‍ ആന്‍ഡ് ദിയു (6.82%), ചണ്ഡിഗഡ് (5.97%) എന്നിവിടങ്ങളിലാണ് ഏറ്റവും കൂടുതല്‍ ദാരിദ്ര്യം രേഖപ്പെടുത്തുന്നത്. ദാരിദ്ര്യ സൂചികയില്‍ പിന്നിലുള്ളവരാകട്ടെ പുതുച്ചേരി (1.72%), ലക്ഷദ്വീപ് (1.82%), ആന്‍ഡമാന്‍ ആന്‍ഡ് നിക്കോബാര്‍ ദ്വീപുകള്‍ (4.30%), ഡല്‍ഹി (4.79%) എന്നിവയാണ്.