അവിഹിതബന്ധമാരോപിച്ച് യുവതിയെയും സുഹൃത്തിനെയും തൂണില്‍ കെട്ടിയിട്ട് മര്‍ദിച്ചു; ഭര്‍ത്താവ് അറസ്റ്റില്‍

മൈസൂരു: അവിഹിതബന്ധമുണ്ടെന്നാരോപിച്ച് യുവതിയെയും ആണ്‍സുഹൃത്തിനെയും ഭര്‍ത്താവും അയാളുടെ സഹോദരനും ചേര്‍ന്ന് പരസ്യമായി വൈദ്യുതത്തൂണില്‍ കെട്ടിയിട്ട് മര്‍ദിച്ചു. സംഭവത്തില്‍ ഭര്‍ത്താവിനെ പോലീസ് അറസ്റ്റ് ചെയ്തു. മൈസൂരു ജില്ലയിലെ നഞ്ചന്‍കോട് താലൂക്കിലെ ഹെമ്മാരഗാല ഗ്രാമത്തിലാണ് സംഭവം. വിവാഹിതയും മൂന്ന് കുട്ടികളുടെ അമ്മയുമായ 30 വയസ്സുള്ള യുവതി അഞ്ചുവര്‍ഷംമുമ്പ് ഭര്‍ത്താവുമായി വേര്‍പിരിഞ്ഞ് സ്വന്തം മാതാപിതാക്കളോടൊപ്പമായിരുന്നു താമസം. കുടകിലെ കാപ്പിത്തോട്ടത്തിലാണ് യുവതി ജോലിചെയ്തിരുന്നത്. ഇതിനിടെ ഒപ്പം ജോലിചെയ്തിരുന്ന 24-കാരനുമായി യുവതി അടുപ്പത്തിലായി. വെള്ളിയാഴ്ച യുവാവിനെ യുവതി വീട്ടിലേക്ക് ക്ഷണിച്ചു. വിവരമറിഞ്ഞ് യുവതിയുടെ ഭര്‍ത്താവ് രവിയും അയാളുടെ സഹോദരന്‍ ചന്ദ്രുവും വീട്ടില്‍ അതിക്രമിച്ച് കയറി ഇരുവരെയും പിടിച്ചിറക്കി വൈദ്യുതത്തൂണില്‍ കെട്ടിയിട്ട് മണിക്കൂറുകളോളം മര്‍ദിക്കുകയായിരുന്നു. സംഭവമറിഞ്ഞ് ഗ്രാമവാസികള്‍ തടിച്ചുകൂടിയെങ്കിലും ഇവരെ രക്ഷപ്പെടുത്താന്‍ കൂട്ടാക്കിയില്ല. ഒടുവില്‍ ഗ്രാമത്തിലെ മുതിര്‍ന്നവര്‍ ഇടപെട്ടാണ് ഇവരെ വിട്ടയച്ചത്. ഇരുവരെയും കെട്ടിയിട്ട് മര്‍ദിക്കുന്നതിന്റെ വീഡിയോ സാമൂഹിക മാധ്യമങ്ങളില്‍ വ്യാപകമായി പ്രചരിച്ചിരുന്നു. യുവാവുമായി അവിഹിതബന്ധമുണ്ടെന്ന ആരോപണം യുവതി നിഷേധിച്ചു. ചായ കുടിക്കാന്‍വേണ്ടിയാണ് യുവാവിനെ വീട്ടിലേക്ക് ക്ഷണിച്ചതെന്നും യുവതി പറഞ്ഞു. ഒളിവില്‍പ്പോയ ഭര്‍ത്താവിന്റെ സഹോദരനായി തിരച്ചില്‍ പുരോഗമിക്കുന്നുണ്ട്. സംഭവത്തില്‍ ജില്ലാ പോലീസ് മേധാവിയോട് സംസ്ഥാന വനിതാ കമ്മിഷന്‍ റിപ്പോര്‍ട്ട് തേടി.