മൊബൈല്‍ ഫോണ്‍ വാങ്ങി വച്ചതിനെ തുടര്‍ന്നു 11 വയസുകാരന്‍ വീടിനുള്ളില്‍ തൂങ്ങി മരിച്ചു

അമ്മ മൊബൈല്‍ ഫോണ്‍ വാങ്ങി വച്ചതിനെ തുടര്‍ന്നു 11 വയസുകാരന്‍ വീടിനുള്ളില്‍ തൂങ്ങി മരിച്ചു. സ്‌കൂളില്‍ നിന്നും എത്തിയ കുട്ടിയുടെ കയ്യില്‍ നിന്നും അമ്മ ഫോണ്‍ വാങ്ങി വച്ചതാണ് പ്രകോപനത്തിനു കാരണമായത്. കുമ്മണ്ണൂര്‍ പറയ്ക്കാട്ട് രാജു സെബാസ്റ്റ്യന്‍- സിനി ദമ്പതികളുടെ മകന്‍ സിയോണ്‍ രാജുവാണ് മരിച്ചത്. ഏറെ നേരമായി ഫോണ്‍ ഉപയോഗിച്ചുകൊണ്ടിരുന്ന സിയോണിന്റെ കൈയില്‍ നിന്നും വീട്ടുകാര്‍ ഫോണ്‍ വാങ്ങി വച്ചു. ഇതില്‍ പിണങ്ങി കുട്ടി മുറിക്കുള്ളില്‍ കയറി വാതിലടയ്ക്കുകയായിരുന്നു. പുറത്തുപോയ വീട്ടുകാര്‍ തിരികെയെത്തി വിളിച്ചിട്ടും വാതില്‍ തുറക്കാത്തതിനാല്‍ വാതില്‍ തകര്‍ത്ത് അകത്തു കയറിയപ്പോഴാണ് കുട്ടിയെ ഷാളില്‍ തൂങ്ങിയ നിലയില്‍ കണ്ടെത്തിയത്. മൃതദേഹം കിടങ്ങൂരിലെ സ്വകാര്യ ആശുപത്രിയിലേയ്ക്ക് മാറ്റി. കൂടല്ലൂര്‍ സെന്റ് ജോസഫ് സ്‌കൂളിലെ വിദ്യാര്‍ത്ഥിയാണ് സിയോണ്‍. സ്‌കൂളില്‍ പോയ ശേഷം തിരികെ എത്തിയ കുട്ടിയുടെ കയ്യില്‍ നിന്നും ഫോണ്‍ വാങ്ങി വച്ചതാണ് പ്രകോപനത്തിന് കാരണമായതോമന്നു പൊലീസ് പറഞ്ഞു. ചേര്‍പ്പുങ്കലിലെ സ്വകാര്യ ആശുപത്രിയിലെ കോവിഡ് ടെസ്റ്റിന് ശേഷം ഞായറാഴ്ച കോട്ടയം മെഡിക്കല്‍ കോളേജില്‍ പോസ്റ്റുമോര്‍ട്ടം ചെയ്യും.