സ്വകാര്യ റിസോര്‍ട്ടിലെ ലഹരിപ്പാര്‍ട്ടി: കൊലക്കേസ് പ്രതിയടക്കം 20 പേര്‍ പിടിയില്‍

കാരക്കാട്ടെ സ്വകാര്യ റിസോര്‍ട്ടില്‍ നടന്ന ലഹരിപ്പാര്‍ട്ടിയില്‍ പങ്കെടുത്ത ഇരുപതോളം പേര്‍ കസ്റ്റഡിയില്‍. എക്‌സൈസ് എന്‍ഫോഴ്‌സ്‌മെന്റ് നടത്തിയ പരിശോധയിലാണ് സ്ത്രീയും കൊലക്കേസ് പ്രതിയും അടക്കം ഇരുപതോളം പേര്‍ പിടിയിലായത്. ഹഷീഷ് ഓയില്‍, എംഡിഎംഎ, മറ്റു ലഹരി വസ്തുകള്‍ എന്നിവ പിടിച്ചെടുത്തു. 'നിര്‍വാണ' എന്ന കൂട്ടായ്മയാണ് പാര്‍ട്ടി സംഘടിപ്പിച്ചത്. ഇന്നലെ രാവിലെ ആറിന് തുടങ്ങിയ ലഹരി പാര്‍ട്ടി ഇന്ന് ഉച്ചവരെ നീണ്ടു. ആര്യനാട് സ്വദേശ് അക്ഷയ് മോഹന്‍ ആണ് ലഹരിപ്പാര്‍ട്ടി സംഘടിപ്പിച്ചത്. സ്ത്രീകള്‍ അടക്കം നിരവധി പേര്‍ ലഹരിപ്പാര്‍ട്ടിയില്‍ പങ്കെടുക്കുന്നുണ്ടെന്ന വിവരമറിഞ്ഞ് എക്‌സൈസ് ഉദ്യോഗസ്ഥര്‍ എത്തുമ്പോഴും പാര്‍ട്ടി നടക്കുകയായിരുന്നു. മുന്‍പും ഇവിടെ പാര്‍ട്ടി നടന്നിട്ടുണ്ടായിരുന്നു. ഇതു സംബന്ധിച്ചു നിരവധി പരാതികള്‍ എക്‌സൈസിനു ലഭിച്ചിരുന്നു. ഇതിന്റെ അടിസ്ഥാനത്തില്‍ എക്‌സൈസ് റിസോര്‍ട്ടിനെ നിരീക്ഷിച്ചു വരികയായിരുന്നു. ഇന്നലെയും ഇന്നും പാര്‍ട്ടി നടക്കുന്നുണ്ടെന്നു ലഭിച്ച രഹസ്യവിവരത്തെ തുടര്‍ന്നാണ് ഇന്നു ഉച്ചയ്ക്ക് പരിശോധന നടത്തിയത്.