പി എസ്സിക്ക് പകരം വഖഫ് റിക്രൂട്ട്‌മെന്റ് ബോര്‍ഡ് രുപീകരിക്കാന്‍ ആലോചിച്ച് സര്‍ക്കാര്‍

പി എസ്സിക്ക് പകരം വഖഫ് റിക്രൂട്ട്‌മെന്റ് ബോര്‍ഡ് രുപീകരിക്കാന്‍ ആലോചിച്ച് സര്‍ക്കാര്‍. മന്ത്രി വി അബ്ദുറഹ്മാനെ ചര്‍ച്ചകള്‍ക്കായി എ കെ ജി സെന്ററിലേക്ക് വിളിപ്പിച്ചു. വഖഫ് നിയമനങ്ങള്‍ ബോര്‍ഡിന് കീഴിലാക്കുന്നത് സംബന്ധിച്ച ചര്‍ച്ചകള്‍ സി പി ഐ എം ആരംഭിച്ചു. അതേസമയം നിയമനം പിന്‍വലിക്കുന്നത് വരെ സമരം തുടരുമെന്ന് സാദിഖലി ശിഹാബ് തങ്ങള്‍ പറഞ്ഞു. ഉത്തരവ് തത്ക്കാലം നടപ്പിലാക്കില്ലെന്ന സര്‍ക്കാര്‍ വാഗ്ദാനം തട്ടിപ്പാണെന്ന് മുസ്ലിം ലെഗ് ആരോപിച്ചു. പ്രതിഷേധങ്ങള്‍ തുടരുമെന്ന് മുസ്ലിം കോര്‍ഡിനേഷന്‍ കമ്മിറ്റിയും അറിയിച്ചു. മുഖ്യമന്ത്രി സമസ്തയ്ക്ക് വാക്കാല്‍ ഉറപ്പുകൊടുത്തതുകൊണ്ടായില്ല. ഉത്തരവ് പിന്‍വലിക്കുംവരെ കോര്‍ഡിനേഷന്‍ കമ്മിറ്റി പ്രതിഷേധം തുടരുമെന്ന് ഡോ.ഹുസൈന്‍ മടവൂര്‍ പ്രതികരിച്ചു. വഖഫ് ബോര്‍ഡ് നിയമനങ്ങള്‍ പിഎസ്സിക്ക് വിട്ട നടപടി ഉടന്‍ നടപ്പാക്കില്ലെന്ന് മുഖ്യമന്ത്രി സമസ്ത നേതാക്കള്‍ക്ക് ഉറപ്പ് നല്‍കിയതിന് പിന്നാലെയായിരുന്നു നേതാക്കളുടെ പ്രതികരണം. വിഷയത്തില്‍ വിശദമായ ചര്‍ച്ചയാവാമെന്നും അദ്ദേഹം പറഞ്ഞു. സമസ്ത ജനറല്‍ സെക്രട്ടറി ആലിക്കുട്ടി മുസ്ലിയാര്‍ അടക്കം ഏഴംഗ സംഘമാണ് മുഖ്യമന്ത്രിയുമായി കൂടിക്കാഴ്ച നടത്തിയത്.