ബിജെപി പുനഃസംഘടന: സുരേന്ദ്രനെ വിമര്‍ശിച്ച് വീണ്ടും ബിജെപി മുന്‍വക്താവ്

സമൂഹമാധ്യമങ്ങളില്‍ കെ. സുരേന്ദ്രനെ വിമര്‍ശിച്ചതിന് ബിജെപി വക്താവ് സ്ഥാനംപോയ പി.ആര്‍. ശിവശങ്കരന് സംസ്ഥാന സമിതി അംഗത്വവും നഷ്ടമായി. ഇതോടെ സുരേന്ദ്രനെതിരെ വീണ്ടും ഒളിയമ്പുമായി ശിവശങ്കരന്‍ രംഗത്തെത്തി. മൂന്നാംതവണയാണ് സ്ഥാനം നഷ്ടമാകുന്നതെന്നും സ്ഥാനമില്ലെങ്കില്‍ വിഷമിച്ച് മരിക്കില്ലെന്നും അദ്ദേഹം ഫെയ്സ്ബുക്കില്‍ കുറിച്ചു. സംസ്ഥാന സമിതിയില്‍നിന്ന് ഒഴിവാക്കിയ വാര്‍ത്ത സന്തോഷത്തോടെ അറിയിക്കട്ടെ എന്നുപറഞ്ഞാണ് കുറിപ്പ് ആരംഭിക്കുന്നത്. കേന്ദ്ര സര്‍ക്കാര്‍ ഡയറക്ടര്‍ പോസ്റ്റും വേണ്ട. ഒരു പഞ്ചായത്ത് തെരഞ്ഞെടുപ്പില്‍പ്പോലും മത്സരിച്ചില്ലെങ്കിലും സംഘടനാ ഉത്തരവാദിത്വം കിട്ടിയില്ലെങ്കിലും നീതികേടിനെയും അപചയങ്ങളെയും എതിര്‍ക്കുമെന്നും കുറിപ്പില്‍ പറയുന്നു. പുതിയ ഭാരവാഹികളെ നിയമിച്ചതില്‍ എറണാകുളത്ത് അമര്‍ഷം പുകയുകയാണ്. ശിവശങ്കരന്‍ എറണാകുളം കേന്ദ്രമാക്കിയാണ് പ്രവര്‍ത്തിച്ചിരുന്നത്. സുരേന്ദ്രന് താല്‍പ്പര്യമില്ലാത്ത സി ജി രാജഗോപാല്‍, എന്‍ പി ശങ്കരന്‍കുട്ടി എന്നിവര്‍ക്കും പുനഃസംഘടനയില്‍ പ്രധാന സ്ഥാനങ്ങള്‍ കിട്ടിയില്ല. മധ്യമേഖലാ പ്രസിഡന്റ്, ജനറല്‍ സെക്രട്ടറി സ്ഥാനങ്ങളിലുണ്ടായിരുന്ന ഇവരെ സംസ്ഥാന ഭാരവാഹികളാക്കാതെ കമ്മിറ്റിയില്‍മാത്രം ഉള്‍പ്പെടുത്തി. സുരേന്ദ്രന്‍പക്ഷത്തല്ലാത്തതിനാല്‍ മുന്‍ ജില്ലാ പ്രസിഡന്റുമാരായ എം ബി ദിവാകരന്‍, ശശിധരന്‍, സെക്രട്ടറി സുരേഷ്‌കുമാര്‍ എന്നിവരെ തഴഞ്ഞതിലും പ്രതിഷേധമുണ്ട്.