ആരുമില്ലാതിരുന്ന സമയത്ത് വീട്ടമ്മയെ കഴുത്ത് ഞെരിച്ചു കൊന്നു; സഹോദരി ഭര്‍ത്താവ് അറസ്റ്റില്‍

കൊല്ലം കുണ്ടറ പേരയത്ത് വീട്ടമ്മയെ കഴുത്തു ഞെരിച്ചു കൊലപ്പെടുത്തിയ കേസില്‍ സഹോദരി ഭര്‍ത്താവ് അറസ്റ്റില്‍. പേരയം സ്വദേശി രാധിക(52)യെ കൊലപ്പെടുത്തിയ ലാല്‍കുമാറാണ് അറസ്റ്റിലായത്. ഭര്‍ത്താവുമായി ബന്ധം വേര്‍പെടുത്തിയ രാധിക അടുത്തിടെ മുളവന സ്വദേശിയായ 30 വയസ്സുകാരനുമായി അടുപ്പമായി. ഇതിനെച്ചൊല്ലിയുളള കലഹമാണ് ലാല്‍കുമാറിനെ കൊലപാതകത്തിലേക്കു നയിച്ചതെന്നാണ് വിവരം. ലാല്‍കുമാറിനെ മുളവനയിലെ വീട്ടിലെത്തിച്ച് തെളിവെടുത്തു. രാധികയോടൊപ്പമാണ് സഹോദരി ഷീബയും ഭര്‍ത്താവ് ലാല്‍കുമാറും താമസിച്ചിരുന്നത്. രാധികയും യുവാവും തമ്മിലുളള ബന്ധം രാധികയുടെ സഹോദരി ഷീബ ചോദ്യം ചെയ്തിരുന്നു. ഇതറിഞ്ഞ യുവാവ് ഷീബയെ ആക്രമിക്കുകയും കേസില്‍ റിമാന്‍ഡിലാകുകയും ചെയ്തു. തുടര്‍ന്ന് തന്റെ പേരിലുളള വീട്ടില്‍ നിന്ന് ഇറങ്ങിപ്പോകണമെന്ന് രാധിക സഹോദരിയോടും ലാല്‍കുമാറിനോടും ആവശ്യപ്പെട്ടു. ഈ വിരോധമാണ് കൊലപാതകത്തിലേക്കു നയിച്ചത്. വീട്ടില്‍ ആരുമില്ലാതിരുന്ന സമയം നോക്കി ലാല്‍കുമാര്‍ കഴുത്തില്‍ ഷാള്‍ മുറുക്കി രാധികയെ കൊലപ്പെടുത്തി.