മോന്‍സന്‍ മാവുങ്കല്‍ കേസ്; പൊലീസിനെതിരെ ഇ ഡി, ആവശ്യപ്പെട്ട രേഖകള്‍ കൈമാറുന്നില്ലെന്നാണ് പരാതി

കൊച്ചി: മോണ്‍സണ്‍ മാവുങ്കലിനെതിരായ കള്ളപ്പണ കേസില്‍ ക്രൈംബ്രാഞ്ചിനെതിരെ ഇഡി ഹൈക്കോടതിയില്‍. ഇഡി ആവര്‍ത്തിച്ച് ആവശ്യപ്പെട്ടിട്ടും കേസ് രേഖകള്‍ കൈമാറുന്നില്ലെന്ന് കേന്ദ്രം കോടതിയെ അറിയിച്ചു. എന്നാല്‍ ഇഡിയുടെ പരാതി ശരിയല്ലെന്ന് സര്‍ക്കാര്‍ വ്യക്തമാക്കി. രേഖകള്‍ എത്രയും കൈമാറണമെന്ന് നിര്‍ദ്ദേശിച്ച കോടതി, കേസില്‍ കൃത്യമായ അന്വേഷണം നടക്കണമെന്ന് മാത്രമാണ് കോടതിയുടെ താല്‍പ്പര്യമുള്ളതെന്ന് പറഞ്ഞു. മോന്‍സനെതിരെ അന്വേഷണം പുരോഗമിക്കുകയാണെന്നും മൂന്ന് കുറ്റപത്രം തയ്യാറായെന്നും സര്‍ക്കാര്‍ വ്യക്തമാക്കി. അതിനിടെ, മോന്‍സന്‍ കേസില്‍ ഹൈക്കോടതിയെ വിമര്‍ശിച്ച് സോഷ്യല്‍ മീഡിയയില്‍ പോസ്റ്റ് ഇട്ട മുന്‍ മജിസ്‌ട്രേറ്റ് എസ് സുദീപിനെതിരെ നിയമാനുസൃത നടപടി സ്വീകരിക്കാന്‍ കോടതി ഇടക്കാല ഉത്തരവില്‍ റജിസ്ട്രാര്‍ക്ക് നിര്‍ദ്ദേശം നല്‍കി. ചീഫ് ജസ്റ്റിസിന്റെ അനുമതിയോടെ വേണം നടപടിയെന്നും കോടതി വ്യക്തമാക്കി. ഇന്ന് നേരിട്ട് ഹാജരാകാന്‍ കോടതി സമന്‍സ് നല്‍കിയിരുന്നെങ്കിലും സുദീപ് ഹാജരായില്ല. ഈ സമന്‍സ് കോടതി റദ്ദാക്കി. ജഡ്ജിയെ വിമര്‍ശിച്ച് സ്വയം രക്തസാക്ഷിയാകാനാണ് സുദീപ് ശ്രമിക്കുന്നതെന്നും അന്വേഷണം തടസ്സപ്പെടുത്താന്‍ അനുവദിക്കില്ലെന്നും കോടതി വ്യക്തമാക്കി.