ദുബൈയില്‍ വച്ച് മകളെ പീഡിപ്പിച്ചു; ആറ്റിങ്ങല്‍ സ്വദേശിക്കെതിരെ നടപടി ആവശ്യപ്പെട്ട് സ്ത്രീ കേരളത്തില്‍

തിരുവനന്തപുരം: പ്രായപൂര്‍ത്തിയാകാത്ത മകളെ പീഡിപ്പിച്ചെന്ന പരാതിയില്‍ പൊലീസ് നടപടി ആവശ്യപ്പെട്ട് മുംബൈ സ്വദേശി തിരുവനന്തപുരത്ത്. ദുബൈയില്‍ വച്ച് മകളെ പിഡീപ്പിച്ചുവെന്നാരോപിച്ച് ആറ്റിങ്ങല്‍ സ്വദേശിക്കെതിരെ നാല് മാസം മുന്‍പ് നല്‍കിയ പരാതിയില്‍ നടപടിയില്ലെന്നാണ് ആരോപണം. മുന്‍കൂര്‍ ജാമ്യാപേക്ഷ കോടതി തള്ളിയിട്ടും അറസ്റ്റുണ്ടാകുന്നില്ലെന്നാരോപിച്ച് തിരുവനന്തപുരത്ത് പൊലീസ് അധികൃതര്‍ക്ക് മുന്നില്‍ കയറിയിറങ്ങുകയാണ് പ്രവാസിയായ മുംബൈ സ്വദേശി. ദുബൈയില്‍ ബ്യൂട്ടി പാര്‍ലര്‍ നടത്തുന്ന മുംബൈ സ്വദേശിയാണ് നീതി തേടി തിരുവനന്തപുരത്ത് എത്തിയത്. ലിവിംഗ് ടുഗതറായി താമസിച്ച ആള്‍ മകളെ പീഡിപ്പിച്ചുവെന്നാണ് പരാതി. ഇതുവളരെ വൈകിയാണ് അറിഞ്ഞതെന്ന് സ്ത്രീ പറയുന്നു. ആറ്റിങ്ങല്‍ സ്വദേശി ബിനു വിജയകുമാറിനെതിരെയാണ് പരാതി. തന്റെ കുഞ്ഞിനെ എട്ട് വയസുമുതല്‍ 12 വയസ് വരെ പീഡിപ്പിച്ചുവെന്നും കുട്ടി പേടികൊണ്ടാണ് പറയാന്‍ വൈകിയതെന്നും ഇവര്‍ വിശദീകരിക്കുന്നു. ദുബൈ പൊലീസില്‍ പരാതി കൊടുത്തപ്പോള്‍ ബിനു നാട്ടിലായിരുന്നു. ഇയാള്‍ മടങ്ങി വരാത്തതിനാല്‍ തിരുവനന്തപുരത്ത് പരാതി നല്‍കാന്‍ ദുബൈ പൊലീസ് നിര്‍ദ്ദേശിച്ചു. അതിന്റെ അടിസ്ഥാനത്തിലാണ് ആറ്റിങ്ങല്‍ പൊലീസിനെ നാല് മാസം മുന്‍പ് സമീപിച്ചത്. ഇതിനിടെ ഇയാള്‍ മുന്‍കൂര്‍ ജാമ്യത്തിന് കോടതിയെ സമീപിച്ചെങ്കിലും തള്ളി. എന്നിട്ടും പൊലീസ് ഒന്നും ചെയ്യുന്നില്ലെന്നാണ് ആക്ഷേപം. പരാതി വന്നപ്പോള്‍ തന്നെ അന്വേഷിച്ചെങ്കിലും ഒളിവില്‍ പോയെന്നാണ് ആറ്റിങ്ങല്‍ പൊലീസ് പറയുന്നത്. ഇപ്പോള്‍ ബിനുവിന് വേണ്ടി ലുക്ക് ഔട്ട് സര്‍ക്കുലര്‍ പുറപ്പെടുവിച്ചിരിക്കുകയാണ്. എന്നാല്‍ പരാതി നല്‍കിയ ഉടന്‍ ഇടപെട്ടിരുന്നുവെങ്കില്‍ പ്രതിയെ അറസ്റ്റ് ചെയാന്‍ കഴിയുമായിരുന്നുവെന്ന് ഇവര്‍ പറയുന്നു. നീതി തേടി ഈ ഇതര സംസ്ഥാനക്കാരി നാല് മാസമായി ദുബൈ നിന്ന് തിരുവനന്തപുരത്ത് പല തവണയായി വന്നു പോവുകയാണ്.