സിഐഎസ്എഫ് ഉദ്യോഗസ്ഥന്‍ ട്രെയിനിന് അടിയില്‍പ്പെട്ട് മരിച്ചു

കഴക്കൂട്ടംന്മ അച്ഛനെയും അമ്മയേയും യാത്രയാക്കി ട്രെയിനില്‍നിന്ന് ഇറങ്ങവേ കാല്‍ വഴുതി ട്രെയിനിന് അടിയില്‍പ്പെട്ട് സിഐഎസ്എഫ് ഉദ്യോഗസ്ഥന്‍ മരിച്ചു. എറണാകുളം ചെറായി മുനമ്പം ചക്കുംതറ വീട്ടില്‍ അരവിന്ദാക്ഷന്റെയും സത്യഭാമയുടെയും മകന്‍ സി.എ. അജേഷ് (36) ആണു മരിച്ചത്. തുമ്പ വിഎസ്എസ്സിയിലെ സിഐഎസ്എഫ് കോണ്‍സ്റ്റബിള്‍ ആണ് അജേഷ്. വ്യാഴാഴ്ച കഴക്കൂട്ടം റെയില്‍വേ സ്റ്റേഷനില്‍ വച്ചാണ് അപകടം. തന്റെ കൂടെ ക്വാര്‍ട്ടേഴ്സില്‍ ഉണ്ടായിരുന്ന അച്ഛനെയും അമ്മയേയും നാട്ടിലേക്കു യാത്രയാക്കാന്‍ റെയില്‍വേ സ്റ്റേഷനില്‍ എത്തിയ അജേഷ് ലഗേജ് കയറ്റിയ ശേഷം ഇറങ്ങുമ്പോഴേക്കും ട്രെയിന്‍ വിട്ടു. പ്ലാറ്റ്‌ഫോമിലേക്കു ചാടി ഇറങ്ങുമ്പോള്‍ കാല്‍ വഴുതി പ്ലാറ്റ്‌ഫോമിനും ട്രെയിനിനും ഇടയില്‍പ്പെട്ടു. റെയില്‍വേ സ്റ്റേഷനില്‍ ഉണ്ടായിരുന്നവര്‍ രക്ഷപ്പെടുത്തി ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. ഭാര്യ: ആര്യ. മകള്‍: ഹൃദ്യ. മൂന്നു വര്‍ഷം മുന്‍പാണ് തുമ്പ വിഎസ്എസ്സിയില്‍ എത്തുന്നത്.