കൊച്ചി മെട്രോ: 5 ടിക്കറ്റ് ഒരുമിച്ചു വാങ്ങൂ; കുല്‍ഫി ഉള്‍പ്പെടെ സമ്മാനങ്ങള്‍ ഇങ്ങനെ

മെട്രോയില്‍ 5 ടിക്കറ്റ് ഒരുമിച്ചു വാങ്ങിയാല്‍ 100 രൂപയുടെ കുല്‍ഫി വൗച്ചര്‍ സൗജന്യം. ഇന്നു മുതല്‍ മെട്രോയുടെ ഏതു സ്റ്റേഷനുകളില്‍ നിന്നും ഒരുമിച്ചു വാങ്ങുന്ന 5 ടിക്കറ്റുകള്‍ക്ക് ഈ ഓഫര്‍ ലഭിക്കും. ഇടപ്പള്ളി സ്റ്റേഷനിലെ കുല്‍ഫി ഷോപ്പില്‍ വൗച്ചര്‍ മാറാം. വൗച്ചര്‍ ലഭിച്ച് 12 മണിക്കൂര്‍ വരെ മാത്രമേ ഇതിനു പ്രാബല്യമുള്ളു. കുല്‍ഫി കഴിക്കാന്‍ പോകുമ്പോള്‍ വൗച്ചറും 5 ടിക്കറ്റും ഹാജരാക്കണം. ക്രിസ്മസ്, പുതുവത്സര ആഘോഷങ്ങളുടെ ഭാഗമായി മെട്രോ യാത്രക്കാര്‍ക്കു നടത്തുന്ന നറുക്കെടുപ്പ് ആരംഭിച്ചു. ഒരു വര്‍ഷത്തേക്കു മെട്രോയില്‍ സൗജന്യ യാത്രയാണ് ഒന്നാം സമ്മാനം. ആറും മൂന്നും മാസങ്ങളുടെ സൗജന്യ യാത്ര രണ്ടും മൂന്നൂം സമ്മാനങ്ങള്‍. ഇന്നും ഡിസംബര്‍ 31, ജനുവരി ഒന്ന് തീയതികളില്‍ യാത്ര ചെയ്യുന്നവര്‍ക്കാണു മത്സരത്തില്‍ പങ്കെടുക്കാന്‍ അവസരം. ക്യുആര്‍ കോഡ് ടിക്കറ്റില്‍ പേരും മൊബൈല്‍ നമ്പറും എഴുതി സ്റ്റേഷനുകളില്‍ വച്ചിട്ടുള്ള ലക്കി ഡ്രോ ബോക്സില്‍ ഇടണം.