അച്ഛനെയും മകളെയും ആക്രമിച്ചു, ബാറിലും തല്ല്; ഒളിവിലായിരുന്ന ഗുണ്ടാസംഘം പിടിയില്‍

പോത്തന്‍കോട് അച്ഛനെയും മകളെയും ആക്രമിച്ച ഗുണ്ടാസംഘം കൊല്ലം കരുനാഗപ്പള്ളിയില്‍ അറസ്റ്റില്‍. അണ്ടൂര്‍ക്കോണം സ്വദേശികളായ ഫൈസല്‍, റിയാസ്, ആഷിഖ്, നൗഫല്‍ എന്നിവരാണ് പിടിയിലായത്. ഇവര്‍ കരുനാഗപ്പള്ളിയിലെ ലോഡ്ജില്‍ ഒളിവില്‍ കഴിയുകയായിരുന്നു. കാറില്‍ വരികയായിരുന്ന വെഞ്ഞാറമൂട് വയ്യേറ്റ് ഇടവിളാകത്തുവീട്ടില്‍ ഷെയ്ക് മുഹമ്മദ് ഷാ (47), മകള്‍ പ്ലസ്ടു വിദ്യാര്‍ഥിനി നൗദിര്‍ ഷാ (17) എന്നിവരെയാണ് കാറിലെത്തിയ ഗുണ്ടാസംഘം പ്രകോപനമില്ലാതെ ആക്രമിച്ചത്. ബുധന്‍ രാത്രി 8.30നായിരുന്നു സംഭവം. ഭാര്യയെ സ്വകാര്യ ആശുപത്രിയില്‍ ജോലി സ്ഥലത്തുവിട്ട് പിതാവും മകളും വീട്ടിലേക്കു മടങ്ങുകയായിരുന്നു. പോത്തന്‍കോട് ജംക്ഷനു സമീപം ഗതാഗതക്കുരുക്കില്‍ സംഘത്തിന്റെ കാര്‍ മുന്നോട്ട് എടുക്കാന്‍ കഴിയാത്തതിനെ ചൊല്ലിയായിരുന്നു ആക്രമണം. കാര്‍ കുറുകെയിട്ടു തടഞ്ഞശേഷം അസഭ്യം പറഞ്ഞു പാഞ്ഞെത്തുകയും കാറിനുള്ളിലിരുന്ന മുഹമ്മദ് ഷായെ മര്‍ദിക്കുകയും ചെയ്തു. ഇത് ഫോണില്‍ പകര്‍ത്താന്‍ ശ്രമിച്ച മകളെയും ഗുണ്ടാസംഘം മുടിയില്‍ കുത്തിപ്പിടിച്ച് മര്‍ദിച്ചു. ആക്രമണം നടത്തി രണ്ടു മണിക്കൂര്‍ കഴിഞ്ഞ് ഗുണ്ടകള്‍ പോത്തന്‍കോടുള്ള ബാറിലും തല്ലുണ്ടാക്കിയിരുന്നു.