മറ്റൊരു പ്രണയക്കൊല ആവര്‍ത്തിച്ചുകണ്ടു; കഴുത്തറുക്കാന്‍ ഒരാഴ്ചത്തെ ഒരുക്കം

സഹപാഠിയെ കഴുത്തറുത്തു കൊലപ്പെടുത്തിയ കേസിലെ പ്രതി ചെന്നൈയിലെ ഒരു പ്രണയക്കൊലപാതകത്തിന്റെ വിശദാംശങ്ങള്‍ ഇന്റര്‍നെറ്റില്‍ ആവര്‍ത്തിച്ചു കണ്ടിരുന്നതായി പൊലീസിന്റെ കുറ്റപത്രം. തലയോലപ്പറമ്പ് കുറുന്തറയില്‍ കളപ്പുരയ്ക്കല്‍ കെ.എസ്.ബിന്ദുവിന്റെ മകള്‍ നിതിനമോള്‍ (22) കൊല്ലപ്പെട്ട സംഭവത്തില്‍ അറസ്റ്റിലായ സഹപാഠി കൂത്താട്ടുകുളം കോഴിപ്പിള്ളി ഉപ്പനായില്‍ പുത്തന്‍പുരയില്‍ അഭിഷേക് ബൈജുവിന് (20) എതിരെ നല്‍കിയ കുറ്റപത്രത്തിലാണ് വിവരങ്ങള്‍. പാലാ ജുഡീഷ്യല്‍ ഒന്നാം ക്ലാസ് മജിസ്‌ട്രേട്ട് കോടതിയിലാണ് പൊലീസ് കുറ്റപത്രം നല്‍കിയത്. മുന്‍ കാമുകനുമായി നിതിനമോള്‍ വീണ്ടും അടുത്തുവെന്ന സംശയമാണ് കൊലപാതകത്തിലേക്കു നയിച്ചതെന്നു കുറ്റപത്രത്തില്‍ പറയുന്നു. കഴുത്തറുക്കാനായി അഭിഷേക് ബൈജു ഒരാഴ്ചത്തെ ഒരുക്കം നടത്തി. സംഭവവുമായി ബന്ധപ്പെട്ട് നൂറിലേറെ പേരില്‍ നിന്ന് വിശദമായ മൊഴിയെടുത്തിരുന്നു. 80 പേരെ കേസില്‍ സാക്ഷികളാക്കിയിട്ടുണ്ട്. ഫൊറന്‍സിക് വിദഗ്ധരുടെ റിപ്പോര്‍ട്ടുകള്‍ ഉള്‍പ്പെടെ 48 രേഖകളും അനുബന്ധമായി കുറ്റപത്രത്തോടൊപ്പം ഹാജരാക്കിയിട്ടുണ്ട്. 84-ാം ദിവസമാണ് പൊലീസ് കോടതിയില്‍ കുറ്റപത്രം നല്‍കിയത്. പാലാ സെന്റ് തോമസ് കോളജിലെ വിദ്യാര്‍ഥിനി നിതിനമോളെ കോളജ് ക്യാംപസിനുള്ളില്‍ സഹപാഠി അഭിഷേക് ബൈജു കൊലപ്പെടുത്തിയെന്നാണ് കേസ്. ബിവോക് ഫുഡ് പ്രോസസിങ് ടെക്‌നോളജി കോഴ്‌സിലെ ആറാം സെമസ്റ്റര്‍ വിദ്യാര്‍ഥികളായിരുന്നു ഇരുവരും. ഒക്ടോബര്‍ ഒന്നിനു രാവിലെ 11.20നായിരുന്നു സംഭവം. പാലാ എസ്എച്ച്ഒ കെ.പി.ടോംസണ്‍ ആയിരുന്നു അന്വേഷണോദ്യോഗസ്ഥന്‍. ഒക്ടോബര്‍ ഒന്നിനു തന്നെ പ്രതിയെ കസ്റ്റഡിയിലെടുത്ത പൊലീസ് 5 ദിവസത്തിനുള്ളില്‍ ഇതു സംബന്ധിച്ച മുഴുവന്‍ വിവരങ്ങളും ശേഖരിച്ചിരുന്നു. വൈക്കം ന്മ നിരപരാധിയായ തന്റെ മകള്‍ നിതിനയെ കൊലപ്പെടുത്തിയ പ്രതിക്ക് നിയമം അനുശാസിക്കുന്ന പരമാവധി ശിക്ഷ നല്‍കണമെന്നു മാതാവ് ബിന്ദു പറഞ്ഞു. പരമാവധി ശിക്ഷ നല്‍കിയെങ്കില്‍ മാത്രമേ ഇത്തരം കുറ്റകൃത്യം കുറയൂ. ഒറ്റപ്പെടലിന്റെ വേദന ഇന്നും വിട്ടുമാറിയിട്ടില്ല. മകള്‍ക്ക് ജീവിതത്തെപ്പറ്റി ഒത്തിരി കാഴ്ചപ്പാടുകളും മോഹങ്ങളും ഉണ്ടായിരുന്നു. അതെല്ലാം നിമിഷനേരം കൊണ്ട് അണച്ചുകളഞ്ഞു. മറ്റൊരു പെണ്‍കുട്ടിക്കും ഇത്തരം അവസ്ഥ ഉണ്ടാകരുതെന്നും ബിന്ദു പറയുന്നു.