കിഴക്കമ്പലം ആക്രമണം; 10 പേരെ ഇന്ന് കോടതിയില്‍ ഹാജരാക്കും, അതിഥി തൊഴിലാളികളുടെ സമൂഹ മാധ്യമങ്ങളിലെ ഇടപെടലുകള്‍ നിരീക്ഷിക്കും

കിഴക്കമ്പലം ആക്രമണ കേസില്‍ ഇന്നലെ അറസ്റ്റിലായ പത്ത് പേരെ ഇന്ന് കോടതിയില്‍ ഹാജരാക്കും. കേസില്‍ ഇതുവരെ അറസ്റ്റിലായത് 174 പേരാണ്. അതിഥി തൊഴിലാളികളുടെ സമൂഹ മാധ്യമങ്ങളിലൂടെയുള്ള ഇടപെടലുകളും നിരീക്ഷിക്കാന്‍ ഒരുങ്ങിയിരിക്കുകയാണ് പൊലീസ്. ഡി ജി പി വിളിച്ച ഉന്നതതല യോഗത്തിലെ നിര്‍ദേശത്തെ തുടര്‍ന്നാണ് നടപടി. കിഴക്കമ്പലം സംഭവത്തിലെ യഥാര്‍ത്ഥ കാരണം കണ്ടെത്തുമെന്ന് പ്രത്യേക അന്വേഷണ സംഘം വ്യക്തമാക്കി. മദ്യത്തിനൊപ്പം പ്രതികള്‍ ഏതൊക്കെ ലഹരിവസ്തുക്കള്‍ ഉപയോഗിച്ചുവെന്നതിലും വ്യക്തത വരുത്തും. സംഭവത്തില്‍ പരുക്കേറ്റ പൊലീസ് ഉദ്യോഗസ്ഥര്‍ക്ക് ചികിത്സ ചിലവ് സര്‍ക്കാര്‍ ലഭ്യമാകാത്തതില്‍ വിര്‍മശനം ഉയര്‍ന്നതോടെ ചിലവ് ഏറ്റെടുക്കാന്‍ ഡിജിപി നിര്‍ദേശം നല്‍കിയിട്ടുണ്ട്. ആക്രമണത്തിന് പ്രേരണയായ സാഹചര്യങ്ങള്‍ കണ്ടെത്തുകയാണ് പൊലീസ്. കരോള്‍ നടത്തുന്നതുമായി ബന്ധപ്പെട്ട തര്‍ക്കത്തില്‍ എല്ലാത്തിന്റെയും തുടക്കം. എന്നാല്‍ ഈ രീതിയിലുള്ള പ്രകോപനത്തിന് മറ്റെന്തെങ്കിലും കാരണങ്ങളുണ്ടോ എന്നാണ് പൊലീസ് അന്വേഷിക്കുന്നത്. ഇതിനായി തൊഴിലാളികളുടെയും നാട്ടുകാരുടെയും മൊഴി പൊലീസ് രേഖപ്പെടുത്തും. കൂടുതല്‍ ദൃശ്യങ്ങള്‍ അന്വേഷണ സംഘം ശേഖരിച്ചിട്ടുണ്ട്.