തന്നിലേക്ക് പാര്‍ട്ടി ചുരുങ്ങണമെന്ന് ശഠിച്ചാല്‍ നേതൃത്വം അംഗീകരിക്കില്ല; സ്വയം ആളാകരുത്’

സിപിഎം നേതാക്കള്‍ക്കിടയിലെ വിഭാഗീയത ഒരു കാരണവശാലും അംഗീകരിക്കില്ലെന്നു മുഖ്യമന്ത്രി പിണറായി വിജയന്‍. പാര്‍ട്ടിക്കു വഴങ്ങാതെ നേതാക്കള്‍ സ്വയം ആളാകാന്‍ നോക്കിയാല്‍ നേതൃത്വം സ്വന്തംനിലയില്‍ തീരുമാനമെടുക്കുമെന്നും പാലക്കാട് ജില്ലാ സമ്മേളനത്തില്‍ പിണറായി വ്യക്തമാക്കി. സംഘടനാ റിപ്പോര്‍ട്ടിലുള്ള മറുപടിയിലാണ് ഏരിയാ കമ്മിറ്റിയിലെ ചേരിതിരിഞ്ഞുള്ള മത്സരത്തെ മുഖ്യമന്ത്രി വിമര്‍ശിച്ചത്. പുതുശ്ശേരി, കൊല്ലങ്കോട്, കുഴല്‍മന്ദം ഏരിയ കമ്മിറ്റികളിലുണ്ടായ വിഭാഗീയ പ്രവണതയില്‍ വിശദമായ ചര്‍ച്ചയുണ്ടായി. സംഘടനാ റിപ്പോര്‍ട്ടിനുള്ള മറുപടിയിലാണ് മുഖ്യമന്ത്രി നേതാക്കള്‍ക്ക് മുന്നറിയിപ്പ് നല്‍കിയത്. ഏരിയ കമ്മിറ്റിയില്‍ കോങ്ങാട് എംഎല്‍എയ്ക്കുണ്ടായ തോല്‍വി നേതാക്കളുടെ വ്യക്തി താല്‍പര്യത്തിന് തെളിവാണ്. ഇത് ഒഴിവാക്കേണ്ടതായിരുന്നു. വനിതയെന്ന പരിഗണന നല്‍കാന്‍ തയാറാകാത്തത് ചിലരുടെ മനോഭാവത്തിന്റെ പ്രശ്‌നമാണ്. ലോക്കല്‍, ഏരിയ സമ്മേളനങ്ങള്‍ നിര്‍ത്തിവയ്‌ക്കേണ്ടി വന്നത് സംസ്ഥാന ഘടകത്തിന്റെ നിര്‍ദേശം അംഗീകരിക്കാത്തതിന് തെളിവാണ്. തന്നിലേക്ക് പാര്‍ട്ടി ചുരുങ്ങണമെന്ന് ആരെങ്കിലും ശഠിച്ചാല്‍ അതിനെ നേതൃത്വം അംഗീകരിക്കില്ല. അവര്‍ക്കെതിരെ മാത്രമല്ല അവരോട് ചേര്‍ന്ന് കൂട്ടായ്മയുണ്ടാക്കുന്നവര്‍ക്കും പാര്‍ട്ടിയില്‍ ഇടമുണ്ടാകില്ല. പ്രസ്ഥാനമുണ്ടെങ്കിലേ ഓരോരുത്തര്‍ക്കും നിലനില്‍പ്പുണ്ടാകൂ എന്നതു മറന്നുപോകരുത്. സാധാരണക്കാരുടെ ആശ്രയമായ സഹകരണ ബാങ്കുകളെക്കുറിച്ച് വ്യാപക അഴിമതി ആരോപണം വരുന്നത് സമൂഹത്തിന് തെറ്റായ സന്ദേശം നല്‍കും. ബാങ്ക് ഡയറക്ടര്‍ പദവി പലരും ധനസമ്പാദന മാര്‍ഗമാക്കി മാറ്റുകയാണ്. ഇടത് സര്‍ക്കാരിന് തുടര്‍ഭരണം കിട്ടിയത് ജനങ്ങള്‍ പാര്‍ട്ടിയെയും സര്‍ക്കാരിനെയും വിശ്വസിക്കുന്നത് കൊണ്ടാണ്. സര്‍ക്കാരിന്റെ വികസന നേട്ടങ്ങളും സില്‍വര്‍ലൈന്‍ ഉള്‍പ്പെടെയുള്ള പദ്ധതികളും മുഖ്യമന്ത്രി വിശദീകരിച്ചു.