ഏഴ് വര്‍ഷം മുമ്പ് കേരളത്തിലെത്തി; ഒരു കോടി 65 ലക്ഷത്തിന്റെ വസ്തുകേസ്; സര്‍ക്കാര്‍ ഇടപെടലില്‍ തൃപ്തനെന്ന് സ്റ്റീഫന്‍

പുതുവത്സരദിന തലേന്ന് പൊലീസ് പരിശോധനക്കിടെ അവഹേളിക്കപ്പെട്ട സ്വീഡിഷ് പൗരന്‍ സ്റ്റിഗ് സ്റ്റീഫന്‍ ആസ്ബെര്‍ഗ് സംസ്ഥാനത്ത് വസ്തുവാങ്ങിയപ്പോഴും കബളിക്കപ്പെട്ടതായി ആരോപണം. ഏഴ് വര്‍ഷം മുമ്പ് കോവളത്തെത്തിയ സ്റ്റീഫന്‍ ബിസിനസില്‍ താല്‍പര്യം തോന്നി വിഴിഞ്ഞം സ്വദേശിയുടെ സഹായത്തോടെ വാഴമുട്ടം വട്ടപ്പാറ റോഡില്‍ വസ്തു വാങ്ങിയിരുന്നു. എന്നാല്‍ ഇതുവായി ബന്ധപ്പെട്ട പ്രശ്നം നിലവില്‍ കുടുംബ കോടതിയില്‍ നിലനില്‍ക്കുകയാണ്. ഒരു കോടി 65 ലക്ഷം രൂപയ്ക്കാണ് സ്റ്റീഫന്‍ വസ്തു വാങ്ങിയത്. എന്നാല്‍ ഇവിടെ ബിസിനസ് ആരംഭിക്കാന്‍ അനുവദിക്കില്ലെന്നറിയിച്ച് തന്നെ സമ്മര്‍ദത്തിലാക്കുകയാണെന്നും ഇനി എന്താണ് ചെയ്യേണ്ടതെന്ന് അറിയില്ലെന്നും സ്റ്റീഫന്‍ മാധ്യമങ്ങളെ അറിയിച്ചു.എതിര്‍കക്ഷികളുമായി സംസാരിക്കാമെന്ന് പൊലീസ് കമ്മീഷണര്‍ ഉറപ്പുനല്‍കിയിട്ടുണ്ടെന്നും ഇതുവരേയുള്ള സര്‍ക്കാര്‍ ഇടപെടലില്‍ തൃപ്തനാണെന്നും സ്റ്റീഫന്‍ പറഞ്ഞു. വസ്തുവില്‍ വീട് പണിതതിന് ശേഷമുള്ള തര്‍ക്കെം കാരണം കേസ് ഇപ്പോള്‍ കോടതിയുടെ പരിഗണനയിലാണ്. കൊവിഡ് വ്യാപനം രൂക്ഷമായ സമയത്ത് വട്ടപ്പാറ സമുദ്ര ഭാഗങ്ങളിലെ നിര്‍ദ്ധനരായ രോഗികള്‍ക്ക് ചികിത്സാ സഹായങ്ങളും ഭക്ഷണക്കിറ്റുകളും ഇയാള്‍ വിതരണം ചെയ്തിരുന്നു. ഭാര്യ മരിച്ചതിന് ശേഷം സ്റ്റീഫന്‍ നാട്ടിലേക്ക് മടങ്ങി പോയിട്ടില്ല.