സമാന്തര ഫോണ്‍ എക്‌സ്‌ചേഞ്ച്: സൈബര്‍ തീവ്രവാദമെന്ന് പൊലീസ് കോടതിയില്‍

കേരളത്തില്‍ പിടികൂടിയ സമാന്തര ടെലിഫോണ്‍ എക്‌സ്‌ചേഞ്ചുകള്‍ സൈബര്‍ തീവ്രവാദമാണെന്നു പൊലീസ് കോടതിയെ അറിയിച്ചു. ഇന്റര്‍നെറ്റ് സൗകര്യങ്ങള്‍ തീവ്രവാദത്തിനായി ഉപയോഗിക്കുന്നതു തടയുന്ന, ഐടി ആക്ടിലെ 66 എഫ് വകുപ്പ് കേസില്‍ ഉള്‍പ്പെടുത്തി. കോഴിക്കോട് സമാന്തര എക്‌സ്‌ചേഞ്ച് കേസിലെ നാലാം പ്രതി അബ്ദുല്‍ ഗഫൂര്‍ എഫ്‌ഐആര്‍ റദ്ദാക്കണമെന്നാവശ്യപ്പെട്ടു ഹൈക്കോടതിയില്‍ ഹര്‍ജി നല്‍കിയിരുന്നു. തുടര്‍ന്നാണു പൊലീസിന്റെ കണ്ടെത്തല്‍ പ്രോസിക്യൂഷന്‍ കോടതിയെ അറിയിച്ചത്. കേസില്‍ 66 എഫ് വകുപ്പ് ചുമത്തുന്നതിനുള്ള പ്രാഥമിക തെളിവുകള്‍ ഉണ്ടെന്നു കോടതി നിരീക്ഷിച്ചു. കോഴിക്കോട്, ബെംഗളൂരു സമാന്തര എക്‌സ്‌ചേഞ്ച് കേസുകളിലെ പ്രതിയായ ഇബ്രാഹിം പുല്ലാട്ടില്‍ 168 പാക്കിസ്ഥാന്‍ പൗരന്മാരുമായി ബന്ധപ്പെട്ടതിന്റെ തെളിവുകള്‍ ലഭിച്ചിട്ടുണ്ടെന്നും പൊലീസ് അറിയിച്ചു. പാക്കിസ്ഥാന്‍ സ്വദേശി മുഹമ്മദ് റഹീം, ബംഗ്ലദേശ് സ്വദേശി സാഹിര്‍, ചൈന സ്വദേശിനികളായ ഫ്‌ലൈ, ലീ എന്നിവര്‍ക്ക് സമാന്തര ടെലിഫോണ്‍ എക്‌സ്‌ചേഞ്ച് വഴി ഇന്ത്യയിലേക്ക് 'റൂട്ട്' വില്‍പന നടത്തിയിരുന്നെന്ന് ഇബ്രാഹിം പുല്ലാട്ടില്‍ മൊഴി നല്‍കിയിട്ടുണ്ട്.